Россия пойтахтининг Янги Москва номини олган ҳудудида маҳаллий эркак ўзбекистонлик сартарошни ўлдирди. Гўёки бунга сартарош мижознинг сочини ёмон олгани сабаб бўлган, деб хабар беради «Новости Узбекистана».
Қотиллик акс этган видеони сартарошнинг Антон Беляков исмли мижози интернетга жойлаштирди. У 24 ёшли ўзбекистонликнинг профессионал сартарош бўлганини таъкидлаб ўтди.
«Жума куни, 13 октябрда сартарош Даняни юрагига сих билан учта зарба бериб ўлдиришди. Қотилнинг ташқи кўриниши славянча», — деб ёзди Антон видео изоҳида.
Унинг ҳикоя қилишича, бир кун олдин сартарошхонага бақувват бир эркак кириб, сочини олиб қўйишни сўраган, сўнг 200 рубль бериб, кетган. Эртасига барзанги қайтиб келиб, ойнага қараганида сочи ёқмаганини рўкач қилган.
Барзанги айнан нима ёқмаганини тушунтира олмаса ҳам, уни ўтқизиб, сочини тузата бошлашган. Аммо янги натижадан ҳам қониқмаган жиноятчи сартарошни ташқарига олиб чиқиб, олдиндан тайёрлаб қўйилган сихни юрагига уч марта санчиб олган.
«Йигит ўзини ҳимоя қилмади. Ўткинчилар аралашмади», — қўшимча қилди Антон.
Сартарош тез ёрдам етиб келмасидан жон таслим қилган. Жиноятчи номаълум тарафда ғойиб бўлган. Ҳозир уни полиция қидирмоқда.
Сартарош Данянинг исм-шарифи — Достон Одилхонов. У оиладаги ягона фарзанд эди. Россияда унинг қариндошлари йўқ эди. Достоннинг эски мижозлари унинг танасини юртига қайтариш учун пул тўпламоқда.
Изоҳ (0)