Қирғизистон – Қозоғистон чегарасидаги вазият Евросий иқтисодий иттифоқи доирасида эришилган келишувларга зид келади. Бу ҳақда Қирғизистон президенти Алмазбек Атамбаев Баткен вилоятида ҳарбийларга уйлар топшириш маросимида қилган чиқишида айтиб ўтди, деб хабар беради «ТАСС».
«Уч кундан бери Қирғизистон – Қозоғистон чегарасидаги вазиятни кузатяпман. Бу ҳаддан ошишдир. У ерда Евросиё иқтисодий иттифоқи меъёрлари бузилмоқда», — деди у.
Президентнинг сўзларига қараганда, қирғиз халқи «уч кунлик қамал»дан қўрқмайди ва «чет элнинг малайларини сайламайди».
«Қирғизистон бугунги қонунсизликдан ўтиб олади, 2010 йили қилганидай», — қўшимча қилди Атамбаев, ўшанда ҳам Қозоғистон қарийб бир ярим ойга чегараларини ёпиб қўйганига ишора қилиб.
Атамбаев Қозоғистон президенти Нурсултон Назарбоевни Қирғизистон президентлигига мухолифатдан номзод Ўмурбек Бабановни қўллаб-қувватлаётганликда айблаганидан буён бу икки давлат ўртасидаги муносабатлар ёмонлашмоқда. Айни кунларда «Қўрдой» назорат-ўтказиш пунктида Қозоғистон томонидан текширувнинг кучайтирилиши боис одамлар ва машиналар тўпланиб қолмоқда.
Изоҳ (0)