ЖЧ—2018 нинг CONMEBOL минтақасида кутилмаганда 6-ўринни эгаллаб, мундиалдан четда қолиб кетган Чили термаси ҳақидаги мақолалар ОАВ юзини безади дейиш мумкин.
Артуро Видаль, Алексис Санчес каби юлдузлари бор бўлган, Copa America’нинг сўнгги икки йилдаги ғолиби тўплар нисбатига кўра Перу соясида қолди. «Championat.asia» бунинг кичик сабабларидан бирини ошкор қилди.
2016 йилнинг 6 сентябрь куни Чили ўз уйида Боливияни қабул қилиб, кутилмаганда 0:0 ҳисобида дуранг ўйнаб қўйди. Кейинроқ вазиятдан чиқиш учун чилиликлар Боливия сафида регламентга зид равишда Нельсон Кабрера майдонга тушганидан шикоят қилди. ФИФА қоидасига кўра, Кабрера ўйинга тушмаслиги керак эди.
ФИФА Чилининг талабини қондириб, Боливия устидан техник мағлубият ёзди ва Чилига 3 очко тақдим этди.
Бу ҳолат эса ўз навбатида Перуга ҳам қўл келди. Худди ўша йилнинг 1 сентябрь куни перулик футболчилар Боливиядан 0:2 ҳисобида енгилган бўлиб, Нельсон Кабрера унда ҳам ҳаракат қилганди. ФИФА нафақат Чилининг талабини қондирди, балки адолат юзасидан Перуга ҳам техник ғалаба эвазига 3 очко олиб берди.
Агар Чили Кабрера ишини фош этмаганида, саралашни Перудан 1 очко кўпроқ жамғариб якунлаши мумкин эди. Бироқ якунда очколар тенг келиб қолди. Тўплар нисбати Перуда +1 ни, Чилида эса -1 ни ташкил қилаётганди. Бунга Чили сўнгги турда Бразилиядан 0:3 ҳисобида енгилгани ҳам сабабчи. Сўнгги икки гол ўтказилмаганида ҳам Чили имкониятни сақлаб қолган бўларди. Чунки ўзаро ўйинларнинг ҳар иккисида ҳам Перуни таслим қилганди: 4:3 ва 2:1.
Изоҳ (0)