JCh—2018 ning CONMEBOL mintaqasida kutilmaganda 6-o‘rinni egallab, mundialdan chetda qolib ketgan Chili termasi haqidagi maqolalar OAV yuzini bezadi deyish mumkin.

Arturo Vidal, Aleksis Sanches kabi yulduzlari bor bo‘lgan, Copa America’ning so‘nggi ikki yildagi g‘olibi to‘plar nisbatiga ko‘ra Peru soyasida qoldi. “Championat.asia” buning kichik sabablaridan birini oshkor qildi.

2016-yilning 6-sentabr kuni Chili o‘z uyida Boliviyani qabul qilib, kutilmaganda 0:0 hisobida durang o‘ynab qo‘ydi. Keyinroq vaziyatdan chiqish uchun chililiklar Boliviya safida reglamentga zid ravishda Nelson Kabrera maydonga tushganidan shikoyat qildi. FIFA qoidasiga ko‘ra, Kabrera o‘yinga tushmasligi kerak edi.

FIFA Chilining talabini qondirib, Boliviya ustidan texnik mag‘lubiyat yozdi va Chiliga 3 ochko taqdim etdi.

Bu holat esa o‘z navbatida Peruga ham qo‘l keldi. Xuddi o‘sha yilning 1-sentabr kuni perulik futbolchilar Boliviyadan 0:2 hisobida yengilgan bo‘lib, Nelson Kabrera unda ham harakat qilgandi. FIFA nafaqat Chilining talabini qondirdi, balki adolat yuzasidan Peruga ham texnik g‘alaba evaziga 3 ochko olib berdi.

Agar Chili Kabrera ishini fosh etmaganida, saralashni Perudan 1 ochko ko‘proq jamg‘arib yakunlashi mumkin edi. Biroq yakunda ochkolar teng kelib qoldi. To‘plar nisbati Peruda +1 ni, Chilida esa -1 ni tashkil qilayotgandi. Bunga Chili so‘nggi turda Braziliyadan 0:3 hisobida yengilgani ham sababchi. So‘nggi ikki gol o‘tkazilmaganida ham Chili imkoniyatni saqlab qolgan bo‘lardi. Chunki o‘zaro o‘yinlarning har ikkisida ham Peruni taslim qilgandi: 4:3 va 2:1.