Санта-Клаус образи эрамизнинг III—IV асрларида яшаган насроний авлиё Мўъжизакор Николайга бориб тақалади. Илгари унинг жасадини италияликлар 1087 йилда Мирадан ўғирлаб кетиб, Барига олиб борган, у ерда Авлиё Николай черковини қуришган, деб ҳисобланилган. Туркиялик археологларнинг янги тадқиқотлари ушбу маълумотни рад этади, деб ёзади TJournal.
Олимлар 1942—1966 йиллардаги жуда кўп сонли ҳужжатларни таҳлил қилиб чиққанини таъкидлади. Уларда айтилишича, Демре (собиқ Мира) шаҳридаги Авлиё Николай черкови остида авлиё Николай епископ бўлиб хизмат қилган ўша ибодатхона жойлашган. У учун мўлжалланган қабрга бошқа марҳум жойлаштирилган, ҳақиқий Николайнинг жасади эса аввал маълум бўлмаган хонада турибди.
Тахмин қилинаётган жойни компьютер томографи ва электрмагнит нурланишли радар ёрдамида сканерлашди. Ускуналар кўрсатилган жойда ҳақиқатан ҳам бўш ҳудуд борлигини, аммо у тоғ жинсларининг бўлаклари билан ёпилиб қолганини кўрсатди. Тадқиқотчилар қабрни кавлаб очиб, уларнинг тахминлари тўғри ёки нотўғрилигини текшириб кўриши керак. Агар жасад ҳақиқий бўлиб чиқса, у сайёҳларнинг янги тўлқинини олиб келади, бу эса вилоят даромадларини сезиларли даражада кўпайтиради.
Изоҳ (0)