Сурия президенти Башар Асаднинг қўшинлари, шунингдек, Россия ва Эрон ҳарбий гуруҳлари мустақил равишда ИШИД террорчиларини тўлиқ тор-мор этиши эҳтимолдан йироқ. Бу ҳақда Пентагон расмий вакили Эрик Пехон маълум қилди, дея хабар беради «РБК».
«Асаднинг мустабид тузуми, Россия ва Эроннинг уринишлари, ҳатто айрим ҳудудларни вақинча эгаллаган тақдирларида ҳам, ИШИДнинг тўлиқ ва узил-кесил мағлубиятига олиб келиши эҳтимолдан йироқ. ИШИД шаклланишига қисман тузум амалга оширган қатағон чоралари сабаб бўлди. Жангарилар, гуруҳ ўзлари эгаллаб турган ҳудуднинг барчаси ёки катта қисмини бой берса ҳам, хавфли диверсияларни уюштиришда давом этади», — деди Пехон.
Пентагон вакилига кўра, Россия қўллаб-қувватлаётган Башар Асад ҳукумати ҳудудларни ИШИД назоратидан халос қилиш ва бу ерларга террорчилар қайтишининг олдини олишда узоқ муддатли муваффақиятларни намойиш этмади.
АҚШ қўшинлари эса «ИШИД таҳдид сифатида қолгунга қадар терроризмга қарши курашиш ва ҳамкор кучларга ёрдам бериш»ни давом эттиради.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)