Ироқ собиқ президенти Жалол Талабоний 6 октябрь, жума куни Ироқ Курдистонидаги она шаҳри — Сулаймонияда ҳарбий шараф билан дафн этилди. Shafaq News’нинг маълум қилишича, собиқ раҳбар билан видолашиш маросимида ҳудуд расмийлари ва хорижлик вакиллар иштирок этган, деб хабар берди «ТАСС».
Нашрнинг маълумотларига кўра, маросим Ироқ марказий ҳукуматининг норозилигига сабаб бўлган, чунки Талабоний тобутининг устига Ироқ миллий байроғи эмас, балки курд байроғи ёпилган. Бундан ташқари, аввалига Бағдод раҳбарияти Талабоний билан видолашиш маросими пойтахтда бўлиб ўтишини истаган эди, бироқ собиқ президентнинг оиласи марҳумнинг жасади тўғри Сулаймонияга етказилишини талаб қилган.
Талабонийнинг жанозасига ўн минглаб одам ташриф буюрди. Бағдод билан юз бераётган келишмовчиликка қарамай маросимда ироқ ҳамда курд мадҳиялари янграган.
Ироқни 2005—2014 йиллар оралиғида бошқарган Талабоний 3 октябрь куни Германиядаги шифохонада 83 ёшида оламдан ўтган эди.
Ўтган ҳафта референдум ўтказган Ироқ Курдистони раҳбарияти собиқ президентнинг ўлими муносабати билан бир ҳафталик мотам эълон қилди.
Изоҳ (0)