Мексикалик фотомухбир Эдгар Даниэль Кастро 6 октябрь, жума куни Мексиканинг марказий қисмида жойлашган Сан-Луис-Потоси шаҳри аэропорти ҳудудидан ўлик ҳолда топилди. Бу ҳақда El Universal нашрига таяниб, «ТАСС» хабар берди. Қийноққа солинганлик аломатлари мавжуд жасад темир йўл кўтармасидан топилган.
4 октябрь, чоршанба куни ўзларини полиция ходими деб таништирган уч нафар эркак Кастрони номаълум йўналиш бўйича олиб кетган. Кейинроқ ҳуқуқ-тартибот идораларининг ўғирлаб кетилишга алоқадорлиги ҳақидаги иддаолар расман рад этилган.
La Jornada газетасининг ёзишича, Кастро жорий йилда Мексикада қасддан ўлдирилган 10-журналист. Сўз эркинлигига қарши жиноятларни текшириш билан шуғулланувчи махсус прокуратуранинг маълумотларига кўра, журналистларга қарши жиноятларнинг 99,85 фоизи жазосиз қолмоқда. 2000 йилдан буён Лотин Америкаси мамлакатида 104 нафар ОАВ ходими жиноятчилар қурбонига айланган.
Изоҳ (0)