Кўчага чиқишдан қўрқадиган аёл Google Street View орқали саёҳат қилишни бошлади. Ва 65 минг ўқувчиси бор сайёҳ-сураткашга айланди!

Нью-Йоркда очиқ муҳитдан қўрқадиган Жеки Кеннининг «Агорафобия саёҳатчилари» номли кўргазмаси бўлиб ўтмоқда. Кеннининг уйидан ташқарига чиқиши жуда қийин, шунинг учун у Google’даги Street View севиси орқали «саёҳат» қилади ва у ердаги скриншотларни Instagram’га жойлаштиради, деб хабар берди Meduza.

Янги зеландиялик Жеки Кенни ҳаётининг асосий қисмини ваҳимали ҳужумлардан ва ташвишли касалликлардан азият чекиб ўтказган. У иши юзасидан Лондонга кўчиб ўтганида аҳволи ёмонлашган: баъзида аёл навбатдаги ваҳимадан қочиш мақсадида том маънода «уйига югуришига» тўғри келган. Шифокорлар унга «агорафобия» дея ташхис қўйишган; бу нотаниш муҳитда қўрқувни назорат қила олмаслик. Шу сабабли Кенни уйидан узоққа кетмасликка ҳаракат қилади: ваҳимали ҳужум таниш бўлган супермаркетда ҳам содир бўлиши мумкин. «Мен ваҳимага тушиб қоламан, йиқилиб тушаман, устимга барча савдо токчлари қулаб тушади, мен кимгадир жароҳат етказиб қўяман ва шарманда бўламан», — дейди у.

2016 йилда Жеки Кенни ишсиз қолган ва уйдан чиқишига сабаблар янада камайган. Бу ҳолатда ўзини бироз бўлсада чалғитиш учун Кенни Google Street View сервиси хизматидан фойдаланиб, турли шаҳарларни «айлана» бошлайди. Бу ҳақиқий кўнгилхушликка, кейинроқ бутун бошли лойиҳага айланиб кетган: Кенни Google суратга олган қизиқарли кадрлар ва ракурслар ортидан «қувишни» бошлаган. Баъзида у арзирли кадрларни қидириб, компьютер қаршисида кунига 18 соатлаб ўтирган: унинг сўзларига кўра, Google Street View’да кўринган 99,999 фоиз кадрлар — «шунчаки дахшатли».

Натижада Жеки Кеннининг архивида 27 минг скриншот тўпланиб қолган ва у суратларни Instagram’да streetview.portraits. манзилига жойлаштира бошлайди. Аввалига аёл ўз машғулотини эълон қилмаган, бироқ кейинчалик аккаунти номини Аgoraphobis Traveller’га ўзгартирган. «Агорафобия ва ваҳима саёҳат қилиш имкониятимни чеклайди, шунинг учун мен дунёни ўрганишнинг бошқа усулини топдим», — деб кўрсатилади унинг профилида.

«Мен учун Перудаги тор кўчалар бўйлаб сайр қилиш — ажойиб терапия. Реал ҳаётда шундай бўлганида, тезроқ уйга қайтишни ўйлаган бўлардим», — дейди Кенни. Шунга қарамай, Кеннининг сўзларига кўра, Google Street View унинг учун виртуал ҳаётга айланиб қолмаган: «Мен шунчаки визуал таассуротлар қидираман. Ушбу усул орқали ҳақиқий маданиятни тушуниб бўлмайди, ахир одамлар билан суҳбатлашмасдан нимани ҳам ўрганиш мумкин?».

Ҳозирда аккаунтда Тунис, Сенегал, АҚШ, Қирғизистон, Россия ва бошқа кўплаб мамлакларнинг 237 та сурати бор. Кеннининг барча скриншотлари фотошоп ёрдамида қайта ишланади.

Кеннини Instagram’да кузатиб борувчилар орасида агорафобиядан азият чекувчи инсонлар ҳам мавжуд.

Сентябрь охирида Жеки Кеннининг «суратлари» Нью-Йоркда тақдим этилган, унинг ўзини эса кўргазма очилишига таклиф этишган. Кенни самолётда учишдан жуда ҳам қўрққани сабаб, саёҳатга 2 ой тайёргарлик кўрган: таксида ҳаракатланганини, самолёт салонини, шовқинли ишлаётган двигателлар овозини...

Жеки Кеннининг кўргазма очилганидан сўнг, Instagram’га ёзишича, барчаси яхши ўтган ва у атрофдагиларнинг кўмагидан боши осмонга етган. «Энг ажабланарлиси — мен реал ҳаётда одамлар билан кўришдим», — дея тан олади лойиҳа муаллифи.