Жануби-ғарбий махсус ҳарбий округининг «Фориш» тоғ-дала ўқув майдонида Ўзбекистон ва Россия мудофаа вазирликлари қўшинлари бўлинмаларининг махсус тактик-ўқув машқлари бошланди. Бу ҳақда ЎзА хабар бермоқда.
Олдинроқ 2 октябрь, душанба куни эрталабки соатларда Тошкентдаги аэродромга россиялик ҳарбий хизматчилар ўтирган борт келиб қўнгани хабар қилинган эди.
Ўзбекистон Президентининг 4–5 апрелда Россияга давлат ташрифи икки давлат ўртасидаги ҳамкорликни ривожлантиришнинг муҳим йўналиш ва истиқболларини белгилаб берди. Мазкур машқлар Ўзбекистон – Россия муносабатларида янги саҳифа очилган, стратегик шериклик муносабатлари янги босқичга кўтарилган бир пайтда ўтказилмоқда.
Махсус тактик-ўқув машқларида икки мамлакат ҳарбий хизматчилари тинчлик ва хавфсизликни мустаҳкамлаш, халқаро терроризм, экстремизм каби глобал таҳдидларга қарши курашиш, мураккаб тоғ шароитида ноқонуний қуролланган бўлинмани йўқ қилиш бўйича ҳамкорликда аксилтеррор амалиёти ўтказишади. Мақсад — тажриба алмашиш, ҳарбий соҳада ҳамкорлик алоқаларини мустаҳкамлаш.
Ўқув машқларининг биринчи куни қурол-яроғ ва ҳарбий техника кўргазмаси бўлиб ўтди. Унда Ўзбекистон мудофаа вазирлиги қўшинларида қўлланилаётган жанговар қурол-аслаҳа ва техника воситалари намойиш этилди.
Шу куни икки давлат ҳарбий хизматчилари ўртасида спортнинг бир неча тури бўйича мусобақалар ўтказилди.
Шунингдек, ўқув машқлари доирасида ҳарбий илмий конференция ва бошқа маданий-маърифий тадбирлар ўтказилиши режалаштирилган.
Изоҳ (0)