Икки яшар Дилроз ҳозир ўзи учун жуда катта бўлган синовдан ўтаяпти. Унга қон саратони (ОЛЛ — ўткир лейкоз) ташхиси қўйилганда қизалоқ эндигина бир ёшдан ошганди.
Дилрозни биринчи марта шифохонага олиб келишганида аҳволи жуда оғир эди. Шифокорлар қизалоқнинг кичкина жуссаси саратон ва ўпка шамоллашининг оғир даражаси билан курашаётганини аниқлашди. Унга кимётерапия буюрилди. Аммо бундан олдин ўпкаси даволаниши лозимлиги учун, даволанишнинг катта курсини ўтказди.
Шундан сўнг Тошкент шаҳридаги «Қон қуйиш маркази» (Гемотология институтининг 2-шифохонаси)да биринчи кимётерапия ўтказилди. Жараён 60 кундан ортиқ давом этди. Дилрознинг онаси Нилуфар куну-тун қизининг ёнидан жилмади. 26 май куни улар шифохонадан чиқишди.
Ҳозирги кунгача қизалоқ яна бир неча марта кимётерапия олди.
Айни вақтда унинг аҳволи турғун. Шифокорлар яна бир неча марта кимётерапия олиши лозимлиги ва шундан кейин қўшимча равишда қўллаб-қувватловчи даволаш курсини ўташи лозимлигини айтишмоқда. Шундан сўнг у буткул соғайиши мумкин.
Ташвиш бир келса қўша келади, дейишгани рост экан. Дилрознинг биринчи курс кимётерапияси тугагач, яъни 26 май куни унинг отаси оиласидан воз кечди. Ҳолбуки, олдинда даволанишнинг асосий қисми турган эди. Ота қизалоғининг тузалиб кетишига ишонмади ва иқтисодий ёрдам беришдан ҳам бош тортди ва ажрашишини айтди. Ҳозирда суд орқали алимент ундирилмоқда. Афсуски, коллеж ўқитувчиси тўлаётган алимент қиммат дорилар учун етарли эмас.
— Яхши одамлар кўп экан. Интернет тармоғига эълон қўйилгач, кўплаб ёрдамлар бўлди, — дейди Дилрознинг онаси Нилуфар ва ёрдам қўлини чўзган ҳаммага ўзининг миннаторчилигини билдирди. Уларнинг кўпчилигини танимаслигини, лекин ҳамиша улар учун дуода эканлигини айтди.Олдинда катта даволаниш курси турибди. Ёлғиз она-бола учун бу харажатлар анчагина оғирлик қилмоқда. Қолаверса, узоқ вилоятдан келиб пойтахтда яшаш, ижара тўловлари ҳам оз эмас.
Дилрознинг онаси яқин кунгача иш жойи ва ойлиги сақланган ҳолда имтиёзли меҳнат таътилида эди. Шу кунларда раҳбарият уни ишдан бўшатишларига тўғри келишини маълум қилди. Энди Нилуфар ишсиз ва маошсиз.
Ҳозир Нилуфар Тошкент шаҳридан иш изламоқда. Иложи бўлса, уйда ўтириб қилинадиган иш топиш ниятида. Чунки қизини узоқ вақт қаровсиз қолдира олмайди. Касби журналист ва ўқитувчи.
— Энди даволана бошлаганда Дилроз яхши гапира олмасди. Ҳозир у қаери оғриётганини ўзи айтади. Айниқса, кимёвий муолажалардан кейин оёқчаси ва бошини кўрсатиб, оғриётганини айтади. У жуда ҳам бардошли қиз. Ҳозир иккаламиз бир-биримизга ёрдам беришимиз, сабрли бўлиб, ҳаммасига чидашимиз кераклигини айтсам, тушунади. Дилрознинг кейинги босқичларда даволаниши учун катта маблағ зарур бўлмоқда, — дейди Дилрознинг онаси Нилуфар Худойбердиева.Балки Нилуфарга ўзи учун мос бирор иш топишига ёки дори-дармон олишига Сизнинг ҳам ёрдамингиз тегар. Ўз вақтида даво чоралари кўрилса, икки ёшли Дилроз, албатта, соғлом ҳаётга қайтади. Бунга шифокорлар ҳам ишонч билдиришмоқда.
Қуйида Дилроз учун жуда ҳам зарур дорилар рўйхати келтирилмоқда:
- Амбизон — 10 дона (1 донаси — 800 000 сўм)
- Тромборасходник — 3 дона (1 донаси — 1 800 000 сўм)
- Куамен — 10 дона (1 донаси — 38 000 сўм)
- Онкоспар — 1 дона (200 АҚШ доллар)
- Ванкомицин — 5 дона (1 донаси — 58 000 сўм)
- Кюрапенам — 10 дона (1 донаси — 88 000 сўм)
Боғланиш учун телефон рақамлари: (+998-99) 828-66-26, (+998-90) 329-20-78.
Пластик карта рақами: 8600 0529 2729 8982 («Микрокредитбанк»).
Изоҳ (0)