Халқаро жиноят полицияси ташкилоти Бош котибияти ташаббуси ва Швейцариянинг SICPA компанияси билан ҳамкорликда, Тошкентда уч кунлик «Ҳужжатлар хавфсизлигини баҳолаш»га бағишланган тренинг бошланди. Бу ҳақда Ўзбекистон Республикаси ИИВ Матбуот хизмати хабар берди.
Мазкур тренинг аъзо мамлакатларнинг ушбу йўналишдаги фаолиятида ҳуқуқий ёрдам сифатида, тезкор қўллаш ва маълумотлар техник базасидан фойдаланишда ҳамкорлик, қалбаки валюта ва ҳужжатларни аниқлаш юзасидан ташкил этилди. Унда Ўзбекистон, Тожикистон, Озарбайжон ҳуқуқни муҳофаза қилувчи идоралари ходимлари иштирок этмоқда.
2015 йилдан бошлаб, Интерпол Бош котибияти томонидан шахсни тасдиқловчи ҳужжатлар хавфсизлигини ўрганиш ва уларни экспертиза қилиш бўйича ўқув тренинглари ўтказиб келинмоқда. 2015—2017 йиллар давомида 31 мамлакатдан 150 дан ортиқ ҳуқуқни муҳофаза қилувчи идоралар ходимлари қатнашган. Мақсад — ушбу йўналишда аъзо мамлакатлар ҳуқуқ-тартибот идоралари билан ҳамкорликда илғор иш тажрибалари билан ўртоқлашиш.
Ўқув тренинг 12 та ўқув модулини ва 3 та амалий машғулотни ўз ичига олган бўлиб, бунга етакчи мутахассислар инструктор ва эксперт сифатида жалб қилинган.
Таъкидланишича, қалбаки ҳужжатлар давлат бошқаруви аппаратини бир маромда ишлашига салбий таъсир кўрсатиши билан бир қаторда, жамиятга ижтимоий ва маънавий зарар ҳам етказади. Булар юридик ҳужжатларда, кредит расмийлаштиришда, банкдан маблағ олишда, мол-мулкка эгалик қилишда, ноқонуний миграция ва бошқа бир қатор ҳолатларда ўз аксини топади. Шунинг учун юқоридаги ҳолатларда фирибгарликнинг олдини олиш учун ҳуқуқ-тартибот тизими замонавий, технологик ва қулай бўлиши лозим.
Ўзбекистон Республикаси Ички ишлар вазирлиги кейинчалик ҳам ушбу йўналишда фаолият олиб бораётган мутахассисларни тайёрлаш ва тажриба алмашишга тайёрлигини билдирди.
Мазкур тренинг халқаро миқёсда жиноятчиликни олдини олишда ва ҳуқуқни муҳофаза қилувчи идоралар ва Интерпол ўртасида ҳамкорликни ривожлантиришда ўз ҳиссасини қўшади, дейилади хабарда.
Изоҳ (0)