Ўзбекистон суверен кредит рейтингини олиш жараёнига тайёргарликни бошлаб юборди. Бу ҳақда бош вазир ўринбосари Жамшид Қўчқоров 27 сентябрь куни Халқаро пресс-клуб мажлисида айтиб ўтди, деб ёзади «Газета.uz».
«Биз суверен рейтинг олиш ишларининг энг бошланғич босқичидамиз. Citibank бизнинг консультантимиз бўлади, балки бу банклар консорциуми бўлар — буни энг яқин келажак кўрсатади», — деди бош вазир ўринбосари. Унинг сўзларига кўра, кредит суверен рейтингини олиш учун ариза расмийлаштириш дастури Ўзбекистон Президенти томонидан яқин орада тасдиқланишни кутиб турибди.
Жамшид Қўчқоров маълум қилишича, ҳукумат суверен рейтингни хориждан маблағ жалб қилиш манбаларини диверсификациялаш усулларидан бири сифатида кўриб чиқмоқда.
«Суверен рейтинг, аввало — бозорда пулга эга бўлиш учун эмас, у бизга ўзига хос бенчмаркни аниқлаб олиш учун керак», — деди бош вазир ўринбосари. У, шунингдек, суверен рейтингни олгандан кейин Ўзбекистоннинг йирик компаниялари ва банклари ҳам шунга ўхшаш рейтингни қўлга киритиб, бозорда маблағларни жалб қила олишини айтди.
Мамлакат кредит рейтингини олиш тўғридан-тўғри хорижий инвестициялар ўсишига, чет эллик шериклар билан ҳамкорликни кенгайтиришга, шунингдек, банк ва корхоналарнинг дунё молиявий бозорларида пастроқ фоизли ставкалар билан кредит маблағларини жалб қилиш учун қулай шароитларни яратишга имкон беради.
Изоҳ (0)