Олий Мажлиси Қонунчилик палатасида Ўзбекистон Жиноят-процессуал кодекси (ЖПК)га ва Маъмурий жавобгарлик тўғрисидаги кодекси (МЖтК)га ўзгартишлар киритишни назарда тутувчи қонун лойиҳаси биринчи ўқишда қабул қилиниб, иккинчи ўқишга тайёрланмоқда. Бу ҳақда палата депутати Даврон Орипов маълум қилди.
Ориповнинг қайд этишича, амалдаги ЖПКнинг 211-моддасига асосан ташкилот (муассаса, корхона) ва фуқароларнинг мулкидан фойдаланган ҳолда жиноят содир қилиш жараёнида жиноятчилар томонидан фойдаланилган жиноят қуроллари — кимга тегишлилигидан қатъий назар — мусодара қилиниши белгиланган.
Яъни, мазкур мулк эгалари жиноятда қатнашмаган, иштирокчи гумонланувчи ёки айбланувчи бўлмаслар-да, уларнинг мулки мусодара қилиниши мумкин.
ЖПКнинг 2031-моддасига мувофиқ, ашёвий далил деб эътироф этилган — жиноятга тайёргарлик кўриш ёки содир этиш учун махсус мўлжалланган, тайёрланган ёки мослаштирилган нарсалар, шунингдек, жиноий мақсадларга эришиш учун жиноят содир этиш жараёнида бевосита фойдаланилган мол-мулк жиноят қуроли ҳисобланади.
«Бугунги кунга қадар ЖПКнинг 211-моддасига мувофиқ, жиноят қуроли — кимга тегишлилигидан қатъи назар — мусодара қилиниши керак бўлган ва тегишли муассасаларга топширилган ёки йўқ қилиб юборилган», — дейди депутат Орипов.
Депутатнинг қайд этишича, «Ўзбекистон жаҳонда хусусий мулк ва мулкдорларнинг ҳуқуқларини ҳимоя қилиш кафолатлари юзасидан қатъий ўз ўрнига эга. Шунга кўра, қонун лойиҳаси билан мулк жиноят қуроли сифатида фойдаланилганда, мулкдорнинг айби бўлмаган ҳолатлар бўйича мусодара қилиш мумкин эмаслиги ўрнатилмоқда».
Қонун лойиҳасига мувофиқ, юқоридаги талабга ўзгартиш киритилиб, гумон қилинувчига, айбланувчига, судланувчига, маҳкумга тегишли бўлган жиноят қуроллари мусодара қилиниши кераклиги ва тегишли муассасаларга топширилиши ёки йўқ қилиб юборилиши назарда тутилмоқда. Жиноят қуроллари гумон қилинувчига, айбланувчига, судланувчига, маҳкумга тегишли бўлмаган тақдирда, улар мулкдорларига қайтариб берилади.Даврон Орипов, Олий Мажлис Қонунчилик палатаси депутати
Изоҳ (0)