Туркия парламенти 23 сентябрь, шанба куни навбатдан ташқари йиғилишида мамлакат қуролли кучларидан Ироқ ва Сурияда фойдаланишни яна бир йилга узайтирди. Бу ҳақда «РИА Новости» хабар бермоқда.
Қонун лойиҳасини парламентдаги уч партия маъқуллади, курдпараст Халқлар демократияси партияси эса қарши чиқди.
Навбатдан ташқари йиғилиш Ироқ Курдистонида 25 сентябрь куни ўтказилиши мўлжаллаган мустақиллик тўғрисидаги референдум арафасида чақирилди. Бағдод бу тадбирни ноқонуний ҳисобламоқда, Анқара ва Теҳрон эса кескин салбий муносабат билдирди.
Маълумот учун, Туркия парламенти 2014 йил октябрида қуролли кучлардан хорижда фойдаланиш ва мамлакат ҳудудида чет эл қўшинлари бўлиб туришига рухсат берганди. Мандат бир йил давомида амалда бўлди, шундан сўнг парламент қарори билан яна 13 ойга узайтирилди.
Изоҳ (0)