Жиззах шаҳрида "Silk Expert processing» ипак етиштириш ва қайта ишлашга ихтисослашган Ўзбекистон — Буюк Британия қўшма корхонаси пойдеворига тамал тоши қўйилди. Бу ҳақда ЎзА хабар берди.
Шу муносабат билан ўтказилган маросимда «Ўзбекипаксаноат» уюшмаси ходимлари, Буюк британиялик инвесторлар, давлат ва жамоат ташкилотлари вакиллари иштирок этди. Ўзбекистонда ипакчилик тармоғи ва тўқимачилик саноатини янада ривожлантириш, соҳага илғор технологияларни жалб қилиш, илм-фан соҳасидаги инновацион ишланмаларни амалиётга татбиқ этишга қаратилаётган доимий эътибор юксак самаралар бераётгани таъкидланди.
Жиззах шаҳри Сайилжойи маҳалласида барпо этилаётган қўшма корхонанинг лойиҳа қиймати 5 миллион долларга тенг. Корхона биринчи босқичда йилига 144 тонна қуруқ пиллани қайта ишлаш қувватига эга бўлади. Бу кўрсаткични 2021 йилга бориб 576 тоннага етказиш режалаштирилган. Шунингдек, йилига 374 тонна хом пилла қайта ишланади. 2021 йилга бориб бу қувват 1498 тоннага етказилади.
Корхонада пиллани қайта ишлаш баробарида хом ашёни шу ернинг ўзида етиштириш режалаштирилган. 2017—2018 йилларда 48 тонна, 2021—2022 йилларга бориб йилига 192 тонна пилла етиштириш йўлга қўйилади, ипак қурти боқиш 25 минг қутига етказилади. Янги корхонада 240 янги иш ўрни яратилади.
Корхонани қуриш ишлари бошлаб юборилди. Анъанага кўра, тадбирда давлат ва жамоат ташкилотлари вакиллари, қурувчилар, хорижлик меҳмонлар, оммавий ахборот воситалари ходимлари иштирокида заводнинг асосий иншооти пойдеворига келажакка битилган мактуб солинган капсула жойлаштирилди.
Изоҳ (0)