Ислом Каримов номидаги илмий-маърифий мемориал мажмуа томонидан Ислом Каримовни яқиндан билган Ўзбекистон ва хорижий давлатлар фуқароларидан ёзма, фото ва видеоматериалларни қабул қилиш ишлари давом этмоқда.
Бугун, 19 сентябрь куни Ислом Каримов номидаги илмий-маърифий мемориал мажмуага айлантирилган Оқсарой қароргоҳида тадбир бўлиб ўтди. Тадбир мажмуа кутубхонасининг яна 500 та китоблар билан бойитилгани муносабати билан ташкил этилди.
Унда Ислом Каримовнинг рафиқаси Татьяна Каримова, Ислом Каримов номидаги илмий-маърифий мемориал мажмуа кутубхонаси ва фонд ходимлари ҳамда ОАВ вакиллари иштирок этди.
Мустақиллик йиллари мобайнида чоп этилган 124 номдаги ўзбек, қорақалпоқ, рус, инглиз тилларида турли соҳаларга оид китоб, тўплам ва ўқув қўлланмалари мажмуа кутубхонасига «Бақтрия пресс» хусусий нашриёти томонидан совға тариқасида топширилди. Татьяна Каримова хусусий нашриёт раҳбари Лилия Искалиевага миннатдорчилик билдирди ва Ислом Каримов номидаги фонднинг ташаккурномаси билан тақдирлади.
Ҳозирги кунда Ислом Каримов асарларининг электрон нусхаларини тўплаш, уларни мажмуа сайтига жойлаштириш, шунингдек кутубхонани бойитиш каби ишлар амалга оширилмоқда.
Илмий-маърифий мажмуа кутубхонаси Ислом Каримов таваллудининг 80 йиллиги арафасида фойдаланишга топширилиши кутилмоқда.
Изоҳ (0)