Ўзбекистон Фанлар академияси Ботаника ва зоология институти базасида иккита алоҳида илмий муассаса — Ботаника институти ва Зоология институти ташкил этилди. Бу Ўзбекистон Президентининг жорий йил 4 сентябрдаги қарорида кўзда тутилган дея хабар беради «Газета.uz».
Қарор ботаника ва зоология соҳасидаги илмий тадқиқотларни такомиллаштириш ва самарадорлигини ошириш, республика ўсимлик ва ҳайвонот олами биохилма-хиллигини сақлаш, замонавий фан ва иқтисодиёт тармоқларининг талабларидан келиб чиққан ҳолда ботаника ва зоологиянинг алоҳида йўналишларини ривожлантириш, шунингдек, ўсимлик ва ҳайвонот оламини ўрганиш ҳамда муҳофаза қилиш борасидаги махсус вазифалар ечимини тезлаштириш мақсадида қабул қилинди.
Қарорга мувофиқ, ФА Генетика ва ўсимликлар экспериментал биологияси институтининг «Ғўза систематикаси ва интродуксияси» лабораторияси, «Ғўза генофонди» объекти ва иссиқхона комплексини Ботаника институти тасарруфига ўтказиш белгиланди.
Маълумот учун, Ботаника ва зоология институти (аввал — Ўсимлик ва ҳайвонот дунёси генофонди институти) 2012 йилда «Ботаника» илмий-ишлаб чиқариш маркази (2001 йилда ташкил топган) ва Зоология институти (1950 йилда асос солинган) бирлаштирилиши натижасида тузилганди.
Изоҳ (0)