АҚШ молия вазири Стивен Мнучин ёзда турмуш ўртоғи билан асал ойини ўтказиш учун мамлакат ҳарбий-ҳаво кучлари самолётини сўраган. Бу ҳақда ABC телеканали маълум қилди, дея хабар беради «ТАСС».
Телеканалга кўра, вазир рафиқаси, шотландиялик актриса ва модель Луиза Линтон билан Европада асал ойини ўтказишни режалаштирган. Шотландия, Франция ва Италияга саёҳат учун жуфтлик ҳукумат самолётидан фойдаланишни кўзлаган. Бироқ молия вазирлиги бош инспектори бошқармаси бундай талабни номақбул деб топди ва рад этди.
Молия вазирлиги вакилининг телеканалга билдиришича, мазкур талаб Мнучинга Вашингтон билан «тезкор ва хавфсиз алоқа воситалари тақдим этиш» зарурати билан боғлиқ бўлган. Вазир билан бошқа усуллар ёрдамида боғланиш имкони мавжудлиги маълум бўлгач, ҳукумат самолётидан фойдаланишга эҳтиёж қолмаган.
Маълумот учун, АҚШ ҲҲК реактив самолётидан фойдаланиш қиймати соатига 25 минг долларни ташкил этади.
Изоҳ (0)