«Истиқлол» санъат саройининг директори Исроил Ғуломов журналист Феруз Муҳаммадга интервью берди. Исроил Ғуломов суҳбат давомида чет эллик хонандаларнинг концерт билетлари қиммат бўлишининг сабабларини Бочеллининг концерт дастури мисолида тушунтириб берди.
—Чипталарнинг кўчада сотилиши туфайли Бочеллининг концерт чипталари 10 миллион сўмга чиқиб кетгани ростми ?
—Ундай бўлгани йўқ. «Истиқлол» санъат саройидаги 30—35 йиллик фаолиятим мобайнида Бочеллини шахсан ўзим биринчи марта кўришим эди. Шу концерт дастурини ташкиллаштиргани учун Президентимизга, бош вазиримизга ҳамда Алишер Усмоновга миннатдорчилик билдириб қоламан. Чет элдан келадиган ҳар бир хонанда ҳеч бўлмаса 100—120 нафар ёрдамчилари билан келади. Уларнинг оддийгина авиачиптаси минг доллардан туради, шундай экан, умумий ҳисобда йўлнинг ўзига 130 минг доллар кетади. Бундан ташқари, улар юртимизга келганидан сўнг камида 650 миллион сўм харажат қиламиз. Ушбу харажатлар уларнинг меҳмонхонада туриши, овқатланиши ҳамда бу ерда юриши учун сарфланади. Масалан Бочеллининг концерти 8 июль кунига белгиланган бўлса, унинг жамоаси 3 июль куни Тошкентга етиб келган эди. Бочелли жамоасига қойил қолган жойим шунда бўлдики, улар саҳнанинг ҳар бир сантиметрини, ўтирадиган жойларини, хор жамоаси жойлашадиган ўринларни ўлчаб, ўрганиб чиқишди. Мухлислар эътибор беришдими йўқми билмадигу, аммо биз залнинг биринчи қаторини олиб ташладик. Ушбу қаторнинг ўрнига улар кичкина, овознинг майин чиқишини ва у залнинг ҳар бир бурчагига етиб боришини таъминлайдиган колонкалар ўрнатишди.
—Худди ўша Бочелли ўзи билан олиб келган техниканинг нархига қизиқмадингизми?
—У техниканинг бир кунлик ижара ҳақи 103 минг евро экан.
—Демак, агарда чипта нархи 10 миллион сўм бўлган тақдирда ҳам, Бочеллининг юртимизга келиши, жамоасининг ва ўзининг бу ерда юриши, техникаси ҳамда гонорарини қопламас эканда, шундайми?
—Сотилган чипталар ҳаттоки Бочеллининг ўзи учун тўланадиган гонорарни ҳам қопламас эди. Ушбу концерт дастури Президентимиз Шавкат Мирзиёевнинг, шунингдек, бош вазиримиз ҳамда Алишер Усмоновнинг юртдошларимизга қилган совғаси бўлди.
Изоҳ (0)