ЖЧ—2006. «Баҳрайн воқеаси»да ФИФАга хат ёзишдек «ақлли» фикр ҳам Самвел Бабаяндан чиққани очиқланди

Самвел Бабаян бир эмас, икки бор Ўзбекистон термасининг Жаҳон Чемпионатидан четда қолишига сабаб бўлган. Бу ҳақдаги мақола журналист Шуҳрат Шокиржонов томонидан ёзилиб, «Kun.uz» сайтида чоп этилди.

2005 йилнинг 3 сентябрь куни Ўзбекистон терма жамоаси ЖЧ—2006 плей-оффида Баҳрайнга қарши майдонга тушиб, Миржалол Қосимовнинг ягона голи эвазига зафар қучганди. Ўша учрашувда япониялик ҳакам Тошимицу Ёшида ўзбекистонликларнинг пенальтидан урган голини техник хатоси билан инобатга олмай, мезбонлар эътирозига сабаб бўлган.

Ўйиндан сўнг Самвел Бабаян ЎФФ биносига ташриф буюриб, ташкилот вице-президенти Бахтиёр Раҳимовни ФИФАга эътироз мактуби ёзишга кўндиришга уринади. Якунда хат ёзилади. Унда ҳакам қилган хато учун Баҳрайн жазоланиши сўралган бўлиб, ФИФА якунда Ўзбекистоннинг ғалабасини бекор қилганди. Кейинроқ Ўзбекистон Баҳрайн билан икки бор дуранг ўйнаб, ЖЧдан четда қолганди.

Бу воқеада бир қатор ўзбекистонлик мухлислар ЎФФ терма жамоалар маркази раҳбари бўлган Алишер Никимбаевни айбдор деб ҳисоблаган. Шуҳрат Шокиржонов мақоласида қайд этилишича, Никимбаев ФИФАга хат ёзишни ақлсизлик деб билган ва бунга қаршилик қилган. Кейинроқ, ФИФАда фаолият олиб бораётган Вячеслав Колосков билан боғланган. Колосков ҳам Никимбаевнинг фикрини ёқлаб, ЎФФни бу ишдан қайтаришга уринган.

Собиқ футболчи Илёс Зейтуллаевнинг агенти Марко Траббуки эса ФИФА бош котиби Мишель Зен-Руфененга қўнғироқ қилиб, хатни қандай ёзиш борасида «қимматли» маслаҳат олади. Мактуб миллий терма жамоа бош мураббийи Боб Хоугтоннинг агенти томонидан битилади. Алишер Никимбаев мазкур ҳолатдан ЎФФ президенти Зокир Алматовни хабардор қилиш керак деб билса-да, Самвел Бабаяннинг қистови билан вице-президент Бахтиёр Раҳимовнинг ўзи мактубга имзо чекиб, уни ФИФАга жўнатади.

Футболни тузукроқ тушунадиган одамларга қарши чиққан Самвел Бабаяннинг «ақлли ғояси», ФИФАдаги Мишель Зен-Руфененнинг 0:3 ҳисобидаги мағлубият ҳақидаги фикри, Бахтиёр Раҳимовнинг Бабаян фикрига қулоқ солиши натижасида, ўзбекистонлик футболчиларнинг тайёр ғалабаси йўққа чиқди. Улар жавоб ўйинида майдонга тушиш учун аллақачон Баҳрайнга етиб борган бир вақтда, ФИФА уларнинг ҳафсаласини бир пул қилган жавоб мактубини йўллаган.

Натижа ва оқибат учун узр сўрашни ўзига эп билмайдиган бу одам, албатта, бу воқеага алоқадорлигини ўлақолса бўйнига олмаслиги аниқ. имзони у қўймаган-да! Лекин ҳурматли мухлислар, Сизлар билиб қўйинглар — бу ҳақиқат!

2005 йилда Бабаян қандай қилиб ёзув чизув орқали натижа қилишга ҳаракат қилган (спорт принципларига тупуриб — на ўша пайтдаги терма жамоамиз футболчиларини ўзига бўлган ишончини, на Баҳрайннинг ўша хатода айби йўқлигини тан олган) бўлса, орадан шунча йил ўтиб, «ақли» кирмаганини исботлади: яна бошқа ўйинларнинг натижасига «осилиб», ЖЧга чиқишни истади. Ҳа, худди шундай! Акс ҳолда, ЖЧга гол уриб, ғалаба қозониб чиқишни ният қилганида, 5 турдан бери ўйиндан гол ура олмай келаётган терма жамоамизда ниманидир ўзгартириш ҳаракатини кўрган бўлмасмидик?

Шуҳрат Шокиржонов, журналист