Ўзбекистон Президенти Шавкат Мирзиёев 2017 йил 2-сенабрда «Валюта сиёсатини либераллаштириш бўйича биринчи навбатдаги чора-тадбирлар тўғрисида»ги Фармонни имзолади. Ҳужжатда Ўзбекистонда валюта бозорини эркинлаштириш соҳасида давлат иқтисодий сиёсатининг устувор йўналишлари белгиланди. Фармон Ўзбекистон Президентининг расмий сайтида эълон қилинди.
Мавзуга доир: Ўзбекистонда 5 сентябрдан бошлаб жисмоний шахслардан эркин равишда халқаро валюта сотиб олиш бошланади
Биринчи устувор йўналиш сифатида юридик ва жисмоний шахсларнинг эркин равишда хорижий валюта сотиб олиш ва сотиш ҳамда шахсий валюта воситаларини ўз ихтиёрига кўра тасарруф этиш ҳуқуқини амалга ошириш бўйича чораларни таъминлаш белгиланган.
Миллий валютанинг хорижий валютага нисбатан курсини белгилашда бозор механизмларидан фойдаланиш иккинчи йўналиш этиб белгиланган.
Валюта ресурсларидан фойдаланишда бозор инструментларининг ролини ошириш, валюта бозорида барча хўжалик юритувчи субъектлар учун тенг рақобат шароитини яратиш учинчи йўналиш сифатида киритилган. Шунингдек, мазкур йўналишдан ноанъанавий йўналишларда экспортни ривожлантиришда валюта сиёсатининг рағбатлантирувчи ролини ошириш, ҳудудий ва халқаро иқтисодий ҳамкорликни мустаҳкамлаш ҳам ўрин олган
Сифатли ишчи ўринларини яратиш ва маҳсулот ишлаб чиқаришни рағбатлантириш мақсадида барча иқтисодиёт соҳаларига тўғридан-тўғри хорижий инвестицияларни, билимларни ва технологияларни жалб қилишга имкон берувчи бизнес ва инвестицион муҳитни яхшилаш тўртинчи йўналиш сифатида қабул қилинди.
Бешинчи йўналиш эса қатъий монетар сиёсатни юритишни назарда тутади. Унга кўра, қатъий монетар сиёсат миллий валюта барқарорлигини таъминлашга қаратилади. Бунда давлат қимматли қоғозлар бозорини ривожлантириш, шунингдек, очиқ бозорда операциялар амалга ошириш ва банкларга давлат қимматли қоғозлари гарови асосида ликвидликни тақдим эциҳ операциялари кўзда тутилган.
Олтинчи йўналишга асосан, монетар ва фискал сиёсатни мувофиқлаштириш воситасида пул массасининг ҳаддан ортиқ кўпайиб кетишини тўхтатиб туриш, шунингдек, Давлат бюджетининг баланслилигини қўллаб-қувватлаш амалга оширилади.
Банк тизими барқарорлигини қўллаб-қувватлаш ва унинг хатарларга чидамлилигини ошириш мақсадида валюта сиёсатини эркинлаштиришнинг банклар молиявий ҳолатига таъсир қилиши мумкин бўлган салбий оқибатларини енгиллаштириш учун олдиндан самарали чоралар кўрилади. Бу еттинчи йўналиш этиб белгиланган.
Саккизинчи йўналишга кўра, базавий соҳалардаги корхоналарнинг янги валюта сиёсатидаги самарали фаолиятини таъминловчи давлат томонидан қўллаб-қувватлашнинг зарурий чоралари қабул қилинади.
Валюта сиёсатини либераллаштириш жараёни натижасида аҳолининг ижтимоий кўмакка муҳтож қатламига таъсир қилиши мумкин бўлган салбий оқибатларни камайтириш учун кўп томонлама йўналтирилган ижтимоий кўмак чораларининг амалга оширилиши тўққизинчи йўналиш ҳисобланади.
Аввалроқ Ўзбекистонда 5 сентябрдан бошлаб жисмоний шахслардан хорижий валюта эркин тарзда сотиб олиниши ҳақида хабар берилган эди.
Изоҳ (0)