Ҳайвонлар ҳимоячилари Ўзбекистон Президенти ва ҳукуматининг эътиборини ҳайвонларга нисбатан шафқатсиз муносабат муаммосига қаратиш мақсадида change.org сайтида петиция эълон қилди. Бу ҳақда «Новости Узбекистана» хабар берди.
«Бизга эътибор қаратинг», деган сўзлар билан бошланган петиция бир неча кун олдин Ўзбекистондаги ҳайвонлар ҳимоячилари томонидан ишга туширилган. Петицияда улар Президентдан ҳайвонларга нисбатан шафқатсиз муносабат учун жазони қаттиқлаштиришни ва ҳайвонлар муҳофазаси бўйича қонун қабул қилишни сўрамоқда.
«Мазкур қонун лойиҳаси бир неча йилдан бери кўриб чиқишда турибди, бироқ ҳали ҳам қабул қилингани йўқ. Бугунги кунда бутун дунёда давлат томонидан қўллаб-қувватланадиган ҳайвонларни ҳимоя қилувчи кўплаб ташкилотлар, жамиятлар ва гуруҳлар бор. Биз шиддат билан ривожланаётган мустақил ва тараққий этган республикамиз, нима учун унда ҳайвонларга ўрин йўқ? Фақат одамнинг айби билан ҳайвонлар кўчада қолмоқда, улар ҳеч кимга керак эмас. Уларга қасддан жароҳат етказилади, айниқса, байрамлар олдидан, улар шафқатсизларча, механик йўл билан ўлдирилмоқда, болалар ва катталар уларга таёқ ва тош отади, асфальтга уради, деворга улоқтиради», — дейилади петиция матнида.
Ҳайвонлар ҳимоячиларининг таъкидлашича, ички ишлар ходимлари ҳайвонларга нисбатан шафқатсиз муносабат юзасидан ариза берувчиларни жиддий қабул қилмайди, аризани қабул қилишдан ва таҳқирлаш фактини қайд этишдан бош тортади.
Кўнгиллилар бу ҳолатда муаммони битта жарима билан ҳал қилиб бўлмайди, деб ҳисобламоқда. Жарима миқдорини бир неча марта кўпайтириш ёки жиноий жазо белгилаш таклиф қилинмоқда.
Бундан ташқари, ҳайвонлар ҳимоячилари наслсиз, клубларга аъзо бўлмаган ва қабиласиз уй ҳайвонларини боққанлик учун катта миқдорда жарима татбиқ этишни ва уларни боқишни тақиқлашни таклиф қилмоқда. Шунингдек, наслсиз ҳайвонларни мажбурий тартибда стерилизация қилиш ва кастрация (бичиш) ҳақидаги қонун қабул қилиш таклиф қилинмоқда. Бунда ҳайвон ҳақиқатдан ҳам стерилизация қилингани ҳақида гувоҳнома берилиши керак. Шу билан бирга, ҳимоячилар фуқароларга уй ҳайвонларини кўчага ташлаб кетгани учун моддий жавобгарликни белгилаш ва ҳайвонлар сайр қилиши учун махсус жойлар қуришни муҳим, деб ҳисобламоқда.
Асосий талаб сифатида ҳайвонлар ҳимоячилари бир неча йилдан бери курашиб келаётган, ҳайвонларни сақлаб туриш жойларида уларни механик йўқ қилишни бекор қилиш кўрсатилмоқда.
«Кўплаб ривожланган мамлакатлардаги каби инсоний эвтаназияни (даволаб бўлмайдиган касалликдан қийналаётган ҳайвонни махсус воситалар ёрдамида ўлдириш) татбиқ қилиш, ҳайвонларни овлаш хизматларида бўлаётган ҳодисалар устидан ҳайвонларни муҳофаза қилиш ва уйсиз ҳайвонларни қутқариш жамиятлари вакиллари назоратини татбиқ қилиш зарур», — деб таъкидланган петицияда.
Кўнгиллилар қайд этишича, бу муаммонинг ечимида вазиятни комплекс тарзда яхшилайдиган глобал фикр керак. Бириничи навбатда, болаларга боғчадан, мактабдан бошлаб ҳайвонларга меҳрни уйғотиш, жонли бурчакларни ташкил қилиш, ҳайвонларни хафа қилиш эмас, ҳимоя қилиш кераклиги ҳақида гапириш кераклиги ҳайвонлар ҳимоячилари томонидан таъкидланмоқда.
«Биз бир неча марта ҳайвонларни сақлаш учун жой ажратишни сўраб мурожаат қилдик, кўнгиллилар бу иш билан шуғулланишга тайёр. Бироқ бу давлат кўмагида бўлса, икки баравар самарали бўлади. Бир эмас, бир нечта сақлаш жойини ташкил этиш керак, одамлар бажонидил ёрдам беради, айниқса, бу шаффоф бўлса. Бизда ҳайвонларни даволаш, стерилизация ва кастрация қилишда тўлов қилиш имконини берувчи Click тизими бор. Муаммо шундаки, бизда реклама йўқ ва бундай хизмат ҳақида билувчилар кам. ОАВ ва телевидениени, албатта, жалб қилиш керак», — дейилади петицияда.
Изоҳ (0)