Россияда 2018 йилги президент сайловларида аёл номзодларни илгари суриш эҳтимоли муҳокама қилинмоқда. Бу ҳақда президент маъмуриятидаги манбалар маълум қилди, дея хабар беради TJournal.
Улар орасида 5-7 киши кўрилмоқда, бироқ манбалардан бири ҳеч қайси партия аъзоси бўлмаган аёл номзодига тўхталинганини билдирмоқда.
Экспертлар Ксения Собчакни «идеал вариант» деб атади, чунки «у сиёсатга киришиш истагида бўлган замонавий ёш аёл тимсолини намойиш этади». Шу билан бирга, телебошловчи «типик рус аёли»га унчалик мос келмаслиги, сайловларда иштирок этиши ҳам гумон эканлиги таъкидланмоқда.
Бошқа эҳтимолий номзодлар қаторида Россия аёллар социал-демократик иттифоқи раиси Наталя Великая, Ота-оналар миллий қўмитаси етакчиси Ирина Волинец ва «Справедливая Россия» партияси марказий кенгаши аъзоси Ирина Петеляева ҳам тилга олинган.
Маълумот учун, Россияда олдинлари ҳам президентлик сайловларида аёллар номзоди қўйилган. Хусусан, 2000 йилда ҳозирда Марказий сайлов комиссияси раиси бўлган Элла Памфилова, 2004 йилда эса сиёсатчи Ирина Хакамада илгари сурилганди.
Изоҳ (0)