Forbes Россиянинг энг бой оилалари рейтингини эълон қилди

Forbes журнали Россиядаги энг бой оилалар рейтингини эълон қилди, деб хабар берди «Интерфакс».

Ўтган йил давомида энг бой ўнта оиланинг умумий даромади 2 миллиард долларга ошиб, 27 миллиард долларни ташкил этди. Биринчи ўринни таркибига нефть, кўмир, кўчмас мулк, қурилиш ва молиявий тармоқларни ўз ичига олувчи «Сафмар» гуруҳига эгалик қиладиган Гуцериевлар оиласи эгаллади. Журнал ушбу оиланинг жами бойлигини 9,91 миллиард доллар дея баҳолади.

Рейтингдаги иккинчи ўринни Ротенберглар оиласи жами 4,2 миллиард доллар бойлиги билан банд этди. 2015 йилги рейтингда ҳам Ротенберглар оиласи Гуцериевлар оиласидан кейин иккинчи поғонани эгаллаган эди. Ушбу оиланинг бойлиги «Газпром» ва бошқа давлат буюртмалари, хусусан, Керченский кўпригининг қурилиши ортидан тўпланган.

Учинчи ўринни ака-ука Алексей ва Дмитрий Ананевлар эгаллади, нашрнинг маълумотларига кўра, уларнинг бойлиги 2,7 миллиард долларга тенг. Ака-укалар активларга тенглик асосида эгалик қилади. Уларнинг «Промсвязькапитал» холдингига «Промсвязьбанк» (акцияларининг 50,03 фоизи), «Возрождение» банки (акцияларининг 50,003 фоизи) ҳамда Кипрдаги P.S. Capital инвестиция компанияси киради. Шунингдек, уларга Россиядаги энг катта тизим интегратори «Техносерв»нинг (2016 йилда 50 миллиард рубль даромад кўрган) 50 фоиз акцияси тегишли.