Матбуот Януковичнинг учинчи ўғли ҳақида маълумот берди

Украинанинг собиқ президенти Виктор Янукович ҳозирда уч ёшли ўғлини тарбияламоқда. Бу ҳақда Украинанинг қатор нашрлари маълум қилди, деб хабар беради «Корреспондент.net».

Айтилишича, Янукович билан фуқаролик никоҳидаги Любовь Полежай 2014 йили Россияда фарзанд дунёга келтирган. Полежай Украинани ўша йилги воқеалардан сўнг тарк этгани тахмин қилинмоқда.

Жорий йилнинг февраль ойида Янукович Der Spiegel газетасига берган интервьюсида рафиқаси Людмила билан ажрашганини маълум қилди. Улар 45 йил давомида бирга яшаган эди.

Ўша интервьюнинг ўзида собиқ давлат раҳбари собиқ ошпазининг синглиси Любовь Полежай билан норасмий никоҳда эканлигини тасдиқлади.

Полежайнинг турмушдан олдинги фамилияси Содиқова бўлиб, унинг биринчи турмушидан Мария исмли қизи бор.

Януковичнинг биринчи рафиқасидан Александр ва Виктор исмли ўғиллари бор эди. Кичик Виктор Янукович 2015 йили Байкал кўлидаги муз автопойгаси чоғида ҳалок бўлган эди.

Уларнинг онаси Людмила Янукович ҳозир Қримда истиқомат қилади.