Москвада 1 сентябрь куни теракт уюштирмоқчи бўлган шахслардан бири ўзбекистонлик бўлиб чиқди

Москвада теракт уюштириш гумони остида қўлга олинган шахслардан бири ўзбекистонлик экани маълум бўлди. Бу ҳақда «ТАСС» хабар бермоқда.

Meduza хабарига кўра, Россия Федерал хавфсизлик хизматининг Жамоатчилик алоқалари маркази 31 август куни 1 сентябрда одамлар гавжум жойларда теракт уюштириш учун тайёргарлик кўрган, асли Марказий Осиёдан бўлган икки киши қўлга олинганини маълум қилган эди.

Қўлга олинганларнинг ҳар иккиси ИШИД террорчилик ташкилоти аъзолари экани айтилмоқда. Улардан бири — Д.Т. Шариповнинг ёнидан болта (гумонланувчининг тўлиқ исми ошкор этилмаяпти), Муродбек Қодировнинг ёнидан эса портловчи ускуна топилган.

Сўнгги маълумотларга кўра, Қодиров — Ўзбекистон фуқароси, Шарипов эса — тожикистонлик. Москва шаҳрининг Мешчанский туман суди Қодировни 31 октябрга қадар ҳибсга олиш ҳақида қарор чиқарган. «ТАСС» хабарига кўра, ўзини портлатмоқчи бўлган 25 ёшли ўзбекистонлик «айбига иқрорлиги, қилган ишидан афсусдалиги»ни таъкидлаган.