Британиянинг Times Higher Education журнали физика, кимё, тиббиёт ҳамда иқтисод бўйича Нобель мукофотининг 50 нафар лауреати орасида сўров ўтказди. Хусусан, журнал инсониятга хавф туғдирувчи глобал таҳдидлар ҳамда сунъий интеллект томонидан туғилиши мумкин бўлган рақобат юзасидан олимлар фикри билан қизиқди.
Олимларнинг 34 фоизи инсоният учун аҳолининг кўпайиши ва атроф-муҳит деградацияси (глобал исиш) таҳдид солмоқда дея ҳисоблаган бўлса, 23 фоизи ядровий урушни хавфлироқ деган. Сўровда иштирок этган олимларнинг 8 фоизи эса юқумли касалликлар ҳамда дорилар қаршилигини хавфлироқ дея топган.
«Сунъий интеллект ва роботларнинг киритилиши тадқиқотчи инсонларга бўлган эҳтиёжнинг пасайишига олиб келадими?» деган саволга олимларнинг ярми «эҳтимоллиги кам», 24 фоизи «албатта йўқ» деган бўлса, яна шунчаси «бўлиши мумкин», икки фоизи эса (бир одам) — «ҳа, албатта» дея жавоб қайтарган. Олимларнинг бири «роботларда тасаввур йўқ» деган.
Сунъий интеллектни инсоният учун хавф туғдиради дея бир неча бор маълум қилган америкалик бизнесмен Илон Маск ва британиялик Стивен Хокинг Нобель лауреатларининг фикрига қўшилмаган.
Изоҳ (0)