Олимлар жигарни қайта тиклашнинг янги усулини топди

Шотландия, АҚШ ва Россия олимлари жигар ички ўт йўллари ҳужайралари жигарнинг қайта тикланишида иштирок этишини кўрсатиб берди, деб ёзади «ТАСС».

Эдинбургдаги Регенератив тиббиёт маркази, Массачусетс технология институти ва Сколково илм-фан ва технологиялар институти олимларининг кашфиёти жигар хасталиклари, масалан, сирроз билан курашишда ёрдам беради.

Жигар ҳужайралари — гепатоцидлар регенерация (қайта тикланиш, қайта ўсиш)га қодир, аммо бу амалда етарлича тез юз бермайди, янги ҳужайралар эса тез қарийди. Шу туфайли олимлар жигар учун тана ҳужайралари ролига мос келувчи ва унинг тўқималарини қайта тикловчи бошқа ҳужайраларни қидирди.

Шу мақсадда олимлар жигар ўт йўллари ҳужайралари — холангиоцитларни текшириб кўрди. Тажрибада сичқонлардан фойдаланишди, уларда жигар хасталигини келтириб чиқаришди, сўнг унинг қайта тикланишини кузатишди. Тажриба сичқонларининг гепатоцитларидаги ҳужайралар бўлиниши учун жавобгар бўлган ген ўчириб қўйилди, олимлар жигар уларсиз қандай тикланишини кўрмоқчи бўлди.

Жигар тўқималари барибир тикланди. Олимлар бу холангиоцитлар ҳисобига амалга ошганини аниқлади. Улар ўт йўлларидан чиқиб, «носоз» гепатоцитлар ўрнига, жигар ҳужайраларига айланган.

Энди олимлар сиррозга чалинган одамнинг жигарини ўз холангиоцитларини кўчириб ўтказиш ёрдамида қайта тиклашни ўрганмоқчи.