Европарламент келгуси ҳафтада Евроиттифоқ Бирдамлик фондидан зилзилалардан жабрланган Италия минтақаларини тиклашда ёрдам бериш учун 1,2 миллиард евро ажратилишини маъқуллаши кутилмоқда. Бу ҳақда «РИА Новости» хабар бермоқда.
«Бюджет бўйича қўмита Италиянинг Абруццо, Лацио, Марке ва Умбрия минтақаларига 2016—2017 йиллардаги зилзиладан сўнг тикланишига ёрдам бериш учун Бирдамлик фондидан 1,2 миллиард евро ажратилишини маъқуллаши лозим», — дейилади Европарламент пресс-релизида.
Европарламентдаги EPP партиясига кўра, Марказий Италияда 2016 йил августи ва 2017 йил январи ўртасидаги кучли зилзилалар 333 киши ҳалок бўлиши, инфраструктура, бизнес ва жабрланган аҳоли ҳаёт тарзига жиддий зарар етишига олиб келди. 30 минг кишига ёрдам талаб қилинмоқда.
Бирдамлик фонди (EU solidarity fund) 2002 йили Европа давлатларига йирик табиий офатларда кўмак бериш учун ташкил этилган бўлиб, шу пайтга қадар 20 дан ортиқ мамлакатга жами 5 миллиард евродан ортиқ маблағ ажратди. Италияга берилиши режалаштирилаётган сумма фонд томонидан бир пайтнинг ўзида ажратиладиган энг йирик миқдордаги маблағ ҳисобланади.
Изоҳ (0)