Йил бошидан бери Европага Ўртаер денгизи ёки қуруқлик орқали боришга уринган 2,2 мингдан ортиқ қочоқ ва муҳожир ҳалок бўлди ёки бедарак йўқолди. Бу ҳақда БМТнинг қочоқлар иши бўйича олий комиссари бошқармаси ҳисоботида маълум қилинди, дея хабар беради «ТАСС».
Ўртаер денгизини кесиб ўтаётганлар сони кескин камайган ва 107 минг кишини ташкил этган. Туркиядан Грецияга бўлган йўналишнинг ўзида муҳожирлар оқими 94 фоизга пасайгани қайд этилди.
Январдан бери Грецияга 9 минг қочоқ келди, ўтган йили бу кўрсаткич 150 минг кишидан ортиқ эди. Шимолий Африкадан Италияга йўл олганлар сони деярли ўтган йилги даражада қолди ва салкам 84 минг кишидан иборат бўлди.
Бошқармага кўра, Европага келаётганлар сони сезиларли даражада пасайган бўлса ҳам ҳалок бўлиш эҳтимоли юқори даражада қолмоқда. Охирги ярим йил мобайнида 2253 киши денгизда ҳалок бўлди ёки бедарак йўқолди. Камида 40 киши қуруқликда, Европа чегаралари яқинида ҳаётдан кўз юмди.
Изоҳ (0)