Ўзбекистон бокс терма жамоаси ортда қолган 12 та Жаҳон чемпионатида қандай иштирок этган?

Германиянинг Гамбург шаҳрида старт олган бокс бўйича Жаҳон чемпионати Ўзбекистон термаси учун 13-си ҳисобланади. «Оламспорт» нашри ортда қолган 12 та мундиалдаги натижаларга эътибор қаратишни лозим топган.

10-ўрин

1974 йилдан буён ўтказиб келинаётган бокс бўйича Жаҳон чемпионатларида медаль жамғариш бўйича Ўзбекистон терма жамоаси 10-ўринни эгаллаб турибди. Ҳозирча ўзбекистонлик чарм қўлқоп усталари мундиалларда 5 та олтин, 10 та кумуш ва 15 та бронза медалини қўлга киритган.

Бу борада Куба боксчилари билан рақобатлашиш жуда қийин. Улар энг яқин таъқибқичиси бўлган Россиядан 44 та кўпроқ олтин олишга эришган.

Агар рейтингга эътибор берилса, Собиқ Иттифоқ термаси 15 та олтин медални қўлга киритганини кўриш мумкин. Айтиш керакки, мана шу олтинлардан бири ўзбекистонлик Руфат Рисқиевга тегишли. У 1974 йил Гаванадаги Жаҳон чемпионатида шоҳсупа чўққисига чиқишга муваффақ бўлганди.

Шунингдек, 1991 йил Артур Григорян Сиднейдаги Жаҳон чемпионатида кумуш медални қўлга киритган.

ЖЧ мезбонлари

Ўзбекистон бокс терма жамоаси Жаҳон чемпионатларидаги иштирокини 1993 йил Финляндия мундиали орқали бошлаган. Боксда дунёнинг энг кучли спортчилари ҳар икки йилда бир марта жаҳон чемпионлиги учун кураш олиб бориши инобатга олинса, Ўзбекистон делегацияси мундиалга бунгача 12 марта ташриф буюргани ойдинлашади.

• Финляндия—1993 (Тампере)
• Германия—1995 (Берлин)
• Венгрия—1997 (Будапешт)
• АҚШ—1999 (Хьюстон)
• Буюк Британия—2001 (Белфаст)
• Таиланд—2003 (Бангкок)
• Хитой—2005 (Мианянг)
• АҚШ—2007 (Чикаго)
• Италия—2009 (Милан)
• Озарбайжон—2011 (Боку)
• Қозоғистон—2013 (Олмота)
• Қатар—2015 (Доҳа)

Германия—2017 (Гамбург) бу борада Ўзбекистон учун 13-Жаҳон чемпионати бўлади.

Олтинлар

Ўзбекистон терма жамоаси ЖЧда 5 та олтин қўлга киритгани айтилди. Бунда 4 нафар боксчи номи келтирилади: Руслан Чагаев, Муҳаммадқодир Абдуллаев, Ўткирбек Ҳайдаров ва Аббос Атоев. Аббос Жаҳон чемпионатларида 2 та олтин қўлга киритган ягона ўзбекистонлик боксчи ҳисобланади.

Руслан Чагаев 1997 йил Венгриянинг Будапешт шаҳрида олтин медалга эга чиққан. Кейинроқ кубаликликлар унинг профессионал рингга чиқиб улгургани ҳақида бонг уриб, олтин медални бекор қилишни сўраган, деб маълумот берган «Оламспорт».

Шунга қарамай, Чагаев 2001 йил Буюк Британияда барибир ўзини кўрсатди ва барча рақибларини енгиб, олтин медални қўлга киритди.

Ўзбекистон терма жамоаси учун энг омадли ЖЧ 1999 йил Хьюстонда бўлиб ўтганидир. Ўшанда Муҳаммадқодир Абдуллаев ҳамда Ўткирбек Ҳайдаровга олтин медаль насиб қилган, Тўлқин Турғунов кумушни қўлга киритган.

Аббос Атоев эса Чикаго ва Миланда муваффақият қозонган. Кетма-кет икки мусобақада олтин медалга эга чиққан боксчи Ўзбекистон тарихидан жой олган.

Доҳа—2015

Қатар пойтахтида ўтган сўнгги Жаҳон чемпионатида Ўзбекистон терма жамоаси 3 та кумуш ва 3 та бронза медалини қўлга киритди. Яъни, Ўзбекистон терма жамоаси олтин медалга эга чиқа олмади.

Бироқ бир йил ўтиб Ўзбекистон бокс термаси Рио—2016 Олимпиадасида барчани ўзига қаратиб, умумжамоа ҳисобида 1-ўринни қўлга киритди. Шу важдан олиб қараганда, ўзбекистонлик боксчилар Гамбургга фаворитлардан бири сифатида йўл олган. Осиё чемпионатидаги 10 та имкониятдан 9 та олтинга эга чиққан Ўзбекистон термаси Қозоғистондан анча илгарилаб кетиб қолди. Энди бу юришни Жаҳон чемпионатида ҳам давом эттириш керак.