Ҳиндистонда бўлиб турган Ўзбекистон Ташқи ишлар вазири Абдулазиз Комилов бошчилигидаги делегация Деҳлидаги Миллий музейга ташриф буюрди. Бу ҳақда ТИВ матбуот хизмати маълум қилди.
Мазкур музей мамлакатнинг асосий тарихий-бадиий хазинаси ҳисобланиб, ҳозирги кунда бу ерда 200 мингдан ортиқ ҳинд ва хориж санъати намуналари сақланади.
Меҳмонлар Марказий Осиё буюмларига бағишланган ва минтақанинг Ҳиндистон билан боғловчи кўп асрлик ва самарали алоқалари ҳақида гувоҳлик берувчи махсус галерея билан таништирилди.
Давлат раҳбарининг ўзбек халқининг тарихий ва маданий бойликлари намуналарини ватанга қайтариш тўғрисидаги топшириғини бажариш доирасида Ўзбекистон элчихонаси Ҳиндистон томони билан Миллий музейда сақланаётган Заҳириддин Муҳаммад Бобурнинг 1528 йилда ёзилган «Девони Бобур» қўлёзмаси ва 1640 йилда чизилган «Шаҳзода Дори Шикоҳнинг тўй маросими» миниатюрасининг нусхаларини Ўзбекистон томонига расман топшириш масаласини келишиб олди.
Экспозиция билан танишиб чиқилгач, Ҳиндистон Миллий музейи бош директори Будҳа Рашми Мани Ўзбекистон делегациясига юқорида қайд этилган қўлёзма ва миниатюра нусхаларини расман топширди. Улар Ўзбекистон Давлат тарих музейидан жой олади.
Изоҳ (0)