Халқаро пресс-клубнинг Сурхондарё вилоятида бўлиб ўтган сайёр сессиясида пахта йиғим-теримига ўқитувчи ва шифокорларни жалб этиш масаласи кўтарилди.
Томошабинлардан: «Қишлоқ хўжалиги ишларига ўқитувчилар жалб этиладими? Бошқа вилоятларда бу масалалар ҳал бўляпти, бизда қандай?», — деган мазмунда савол тушди.
Саволга жавоб бераркан, Сурхондарё вилояти ҳокими Эркинжон Турдимов ҳудуддаги фаолиятининг биринчи куниданоқ ўқитувчи ва ўқувчиларни қишлоқ хўжалиги ишларига жалб этишни туман ҳокимларига тақиқлаганини айтиб ўтди.
Сурхондарёга ҳоким бўлиб келган кунимоқ барча ҳокимларни йиғиб, бирорта ўқитувчи ва ўқувчини нафақат қишлоқ хўжалиги ишларига, ободонлаштириш ишларига ҳам жалб этмаслик ҳақида кўрсатма берганман.Аввалроқ Бухоро вилояти ҳокими Ўктам Барноев Халқаро пресс-клубнинг сайёр сессиясидаги чиқиши давомида вилоят ўқитувчилари ва шифокорлари 2017 йилги пахта йиғим-терим ишларига жалб этилмаслигини маълум қилган эди.Қаранг, оддий бир ҳолат: ўқитувчини мажбурлаб далага олиб чиқдингиз, рози бўлмай меҳнат қилди, бепул. Уларнинг бари яхши пахтани қарғаб-қарғаб, чопиқ қилиб кетади. У пахта эртага яхши бўладими? Ҳамма нарса розичилик билан бўлиши керак.
Иккинчи масала: бу йилдан пахтанинг харид нархи камида 40 фоизга ошяпти, терим пули ошяпти — пахтани одамларнинг ўзи териб олади. Агар биз ўқитувчини далага чиқарсак, фермер ўта дангаса бўлиб қолади. Ўзи териб олсин, ўргансин.
2010 йилдан бери ҳоким бўлиб ишлайман. Болалар меҳнати деб тинмай бонг урилди, «Мактаб ўқувчилари пахтага чиқарилмайди», дейилди. «Уларни чиқармасак, пахтани қандай териб оларканмиз?», деган масала пайдо бўлди. Йўқ, ўқувчиларсиз ҳам териб олинди. Кейин коллеж ўқувчиларини пахтага чиқармаслик бўйича топшириқ бўлди. «Энди қандай бўларкан?», деб ўзимизга савол бердик, уларни пахтага чиқармадик, лекин пахта териб олинди.
Музработ туманига ҳам, Қизириқ туманига ҳам бориб, ҳамма фермерларга айтдим: пахта терилмаса-терилмасин; термасангиз, кетган харажатларни қоплаб қўйинг — пахтани ўзингиз териб оласиз, деб топшириқ бердим. Одамларга кундалик терим пули тўлаб турилса, нима учун терилмас экан?
Сурхондарё вилоятида чопиққа ҳам, яганасига ҳам, теримига ҳам на ўқитувчи, на ўқувчи, на тиббиёт ходими жалб этилади, умуман, мажбурлаб далага чиқариш ҳолати бўлиши мумкин эмас. Шуни баралла айтмоқчиман: бировга яхши кўриниш учун бировни мажбурлаб далага олиб чиқиб, ишлатиш — ноинсофчилик.
Эркинжон Турдимов, Сурхондарё вилояти ҳокими
Изоҳ (0)