Миллий матбуот марказида «Ўзбеккино» миллий агентлиги томонидан «Мустақиллик йилларида миллий кинематография санъати: кеча, бугун ва эртага» мавзусида матбуот анжумани оътказилди. Матбуот анжуманида агентлик раҳбарияти, кино режиссёрлар, сценаристлар, тизим ташкилотлари раҳбарлари, ОАВ ходимлари қатори журналист Феруз Муҳаммад ҳам иштирок этди.
Тадбирда «Ўзбеккино» миллий агентлиги директори Отабек Мусаев йиғилган журналистларнинг барча саволларига очиқ-ойдин жавоб берди.
- Солиқлар ўз ҳолига тушгандан сўнг, 1 миллиард сўм пул ажратилган режиссёрдан, ажратилган пулнинг ҳеч бўлмаса 70—80 фоизини қайтариш талаби қўйиладими?
- Талаб қўйилиши учун менда тизим бўлиши керак. Мен битта Алишер Навоий кино саройига асосланиб бутун прокат тизими бор дея олмайман. «Ўзбеккино» миллий агентлиги тасарруфида еттита кинотеатр бор, холос. Ўшандан биттаси Алишер Навоий номидаги кинотеатр бўладиган бўлса, биттаси «Киночилар уйи», қолганлари Самарқанд ва Фарғона вилоятида жойлашган. Бошқа вилоятларда «Ўзбеккино» миллий агентлиги тасарруфидаги кинотеатрлар йўқ, яъни прокат тизими йўқ. Ҳозирги барча масалалар бирламчи бўлиб турибди. Кинони ишлаб чиқаргандан сўнг уни жойида кўрсатиш керак, уни кўрсатиш учун кинотеатр, кинозал бўлиши керак. Бўшаган коллеж ва лицейларнинг ҳар бирида фаоллар зали бор. Ўша фаоллар залларида Ёшлар иттифоқи билан кинозал қилиш масаласини кўтарганмиз.
- Тахминан кинопрокат тизими қачон амалга жорий қилиниши мумкин?
- Бизнинг мўлжалимиз бўйича, 200 дан ортиқ кинотеатрни ташкил қилиш масаласи кўтарилган. Ўйлайманки, бир ярим, икки йил ичида бўлади.
- Демак 2019 йилнинг ёз ойларида Республикамизда 200 дан ортиқ кинотеатр бўлади, шундайми?
- Худо хоҳласа, бўлади.
Изоҳ (0)