Google Xprize компанияси билан ҳамкорликда Ой тадқиқотчилари учун янги мукофотларни эълон қилди. Бу ҳақда «Наука» хабар бермоқда.
Жумладан, учувчи объекти Ер йўлдоши орбитаси бўйлаб парвоз қиладиган ёки Ойга қўнадиган жамоа 1,75 миллион доллар билан тақдирланади.
Қурилмаси Ой юзасига шикастланишсиз қўнгани ҳақида маълумотни узатадиган гуруҳ йирикроқ — 3 миллион доллар миқдоридаги мукофотни қўлга киритади. Икки вазифа ҳам 2018 йил 31 мартга қадар амалга оширилиши лозим.
Бош мукофот — 30 миллион доллар Ойга роботни қўндирадиган олимлар гуруҳига берилади. Танлов шартларига кўра, робот Ой ҳудудининг 500 метрини текшириши ва Ерга юқори сифатли сурат ҳамда видеони узатиши лозим.
Ягона шарти лойиҳанинг давлат томонидан молиялаштирилмаслиги бўлган мазкур танловда барча иштирок этиши мумкин. Бироқ катта маблағни талаб этувчи ушбу беллашувда қатнашиш ҳақида ҳозирча атиги 5 жамоа — SpaceIL, Moon Express, Synergy Moon, TeamIndus ва HAKUTO маълум қилди, холос.
Изоҳ (0)