Шерзод Шерматов: Ўзбекистонда мобил алоқа база станцияларидан тарқаладиган нурланишга жаҳондаги энг қаттиқ меъёрлардан бири ўрнатилган

Ўзбекистонда мобил алоқадан фойдаланувчилар сони 21,5 миллиондан ошди. Бу ҳақда «Kommersant.uz» хабар бермоқда.

Мобил алоқа сифатини яхшилаш қўшимча база станцияларини ўнатишни талаб қилади. Мамлакатда бугунги кунга келиб қарийб 18 700 та база станциялари ўрнатилган. Натижада 2017 йилда бу йўналишдаги хизмат кўрсатиш ҳажми ўтган йилнинг биринчи ярим йиллиги якунларига солиштирганда 18,7 фоизга ошди.

Халқаро пресс-клубда шу мавзуга бағишланган йиғилишда иштирок этган Ахборот технологиялари ва коммуникациялари вазири ввазифасини бажарувчи Шерзод Шерматов бу жараёнлар аҳоли томонидан икки хил қабул қилинаётганлигини айтди.

—Келиб тушаётган мурожаатларни таҳлил қилсак, база станциялари таратадиган нурланишлардан хавфсираб, уларни аҳоли яшаш жойларидан олиб ташлашни талаб қилаётганлар ва алоқа сифатини яхшилаш мақсадида турар жойларга қўшимча база станцияларини ўрнатишни сўраётганлар сони баробар бўлмоқда.Шу ўринда айтиш керакки, нурланишлар икки хил бўлади  — ионлашувчи ва ионлашмайдиган. Радиоактив моддалардан таралувчи радиация — ионлашувчи нурланиш. База станцияларидан таралувчи электрмагнит нурланиш эса, радиация эмас, бутунлай бошқа турдаги тўлқинлардир, — деб изоҳ берди Шерзод Шерматов.

Бу борада Ўзбекистонда мобил алоқа база станцияларидан нурланишга ўрнатилган меъёрлар жаҳондаги энг қаттиқ меъёрлардан бири саналади.Мисол учун, Исроилда бу кўрсаткич 400, АҚШ ва Скандинавия давлатларида 100, Россия, Қозоғистон, Белорусда бир квадрат сантиметрга 10 микроваттни ташкил қилса, Ўзбекистонда база станцияларидан таралувчи электрмагнит нурланиш 2,5 микроваттдан ошмайди.

Тадбирда қайд этилганидек, бугунги кунга қадар радиотехника воситаларидан тарқалаётган нурларнинг санитария зарарлари аниқланмаган.

— База станцияларининг зич жойлашуви мақсадга мувофиқдир,– деб билдирилди йиғилишда, — чунки мобил телефон ва база станцияси орасидаги масофа ва тўсиқлар қанчалик кам бўлса, мобил телефондан таралаётган нурланиш қуввати шунчалик камаяди.

Шунингдек, қўл телефони тарқатадиган нурланиш таъсири база станциясиникидан анча кучли эканлиги ҳам таъкидлаб ўтилди.