Ўзбекистон Республикаси Президентининг жорий йил 14 февралдаги «2017—2018 йилларда минтақавий автомобиль йўлларини ривожлантириш дастурини амалга ошириш чора-тадбирлари тўғрисида»ги қарорида нафақат минтақавий, балки умумий фойдаланувда бўлган автомобиль йўлларини қуриш ва тубдан таъмирлашнинг 2017—2018 йилларга мўлжалланган янгиланган дастури ҳам тасдиқланган, деб ёзади Автомобиль йўллари давлат қўмитаси расмий сайти.
Мазкур қарор ижроси юзасидан айни кунда Сурхондарё вилоятидаги автомобиль йўллари ҳам қайта қурилиб, жорий таъмирдан чиқарилмоқда.
Жумладан, вилоятдаги 4Р-105 «Дарбанд қ. - Бойсун ш. - Элбаён қ.» автомобиль йўлининг техник ҳолатини яхшилаш ҳамда йўл қопламасини тиклаш бўйича бир қатор ишлар амалга оширилди. Йўлнинг 65—70-километрлари оралиғида қум ва шағал аралашмасидан асос ёқизилди.
Бундан ташқари, вилоятдаги анчадан бери таъмирталаб бўлиб келган 4Р-100 «Мангузар қ. - Жарқўрғон ш. - Бандихон қ. - Олтинсой қ. – Денов ш.» автомобиль йўлининг 126—137-километрлари оралиғида тўлқинсимон бўртмалар бартараф этилди, 22 км узунликдаги йўл ёқаси текисланди. Йўлнинг 126—137-километрлари ҳамда 140—141-км оралиғидаги қисмида жорий таъмир ишлари бажарилди.
Шунингдек, мазкур автомобиль йўлининг 134-километр қисмида 3 дона оралиқ қурилмали, 42 погон-метр узунликдаги янги кўприк қуриш ишлари давом этаётган бўлиб, мазкур янги кўприк жорий йилнинг декабрь ойида фойдаланишга топширилади. Иншоотнинг умумий қиймати 3 миллиард 212,6 миллион сўмни ташкил этади.
Вилоятдаги йўл қурилиш ва таъмир ишлари бугунги кунда ҳам дастур бўйича давом эттирилмоқда.
Изоҳ (0)