Наргиз Зокирова тадбирда қиёфадоши саҳнага чиқиб куйлаганидан ғазабланди

Хонанда Наргиз Зокирова жанжал марказида қолди, деб хабар бермоқда «Darakchi.uz» «Cosmo.ru» нашрига таяниб.

Россиянинг Чита шаҳрида янги савдо марказларидан бирининг очилиш маросимида машҳур артистларнинг қиёфадошлари иштирокида концерт бўлиб ўтди. Аммо концерт томошабинлари бу ҳақда огоҳлантирилмаганлиги сабабли улар саҳнада ҳақиқий юлдузлар куйлади, деб ўйлади.

Ижтимоий тармоқларда Наргиз Зокированинг куйлаётгани акс этган видеоролик пайдо бўлиб, хонанданинг мухлислари уни ҳақиқий Наргиз Зокирова, деб қабул қилишди. Видеони томоша қилган Наргиз қиёфадошининг чиқишидан даҳшатга тушди.

Хонанда ғазабнок пост ёзиб, шоу ташкилотчиларини ёлғончиликда айблади.

«Бу нима аҳмоқгарчилик? Эркак киши машҳур аёлнинг қиёфасига кириб, ўтказиладиган шоулардан хабарим бор. Аммо видеороликка ёзилган изоҳдан даҳшатга тушдим. Мазкур постни қўйган қиз қиёфадошлар шоуси ўтказилгани ҳақида бир оғиз ёзмаган. У «Наргиз Читанинг савдо марказларидан бирининг очилиш маросимида», — деб расмий саҳифамни қайд қилган. Мен зудлик билан шоу ташкилотчиларидан мазкур ҳолатни изоҳлашни талаб қиламан! Мухлисларимга эса ҳеч қандай қиёфадошим мамлакат бўйлаб ўтказилаётган турда иштирок этмаётганлигини, ўзим эса фақат Максим Фадеев билан ҳамкорлик қилишимни расман эълон қиламан!» — деб ёзди Наргиз Зокирова.