ИШИД террорчилик ташкилоти мисрлик тўрт полициячининг ўлимига сабаб бўлган Синай яримороли шимолидаги ҳужум учун жавобгарликни ўз зиммасига олди. Бу ҳақда «ТАСС» хабар бермоқда.
9 август куни жангарилар салонида полициячилар гуруҳи бўлган автомобилга ҳужум қилган. Ҳужум вилоят пойтахти Ал-Ариш шаҳри яқинида юз берган.
Жангарилар воқеа жойидан яширинишга муваффақ бўлган. Хавфсизлик кучлари ҳудудни ўраб олиб, террорчиларни излашга киришган.
Миср армияси ва полицияси Синайнинг марказий ва шимолий ҳудудларида диний ақидапарастларнинг гуруҳларига қарши бир неча йилдан бери кураш олиб бормоқда.
Ҳудуддаги жангари гуруҳлар орасида энг йириги «Ансор Байт ал-Мақдис» бўлиб, гуруҳ ИШИДга содиқлик ҳақида қасамёд қилган.
Миср хавфсизлик хизмати маълумотларига кўра, мамлакатда охирги йилларда юз берган аксарият террорчилик хуружлари ортида айнан шу гуруҳ жангарилари турибди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)