8 август куни Ўзбекистон Ёшлар иттифоқи раиси Қаҳрамон Қуронбоев ҳамда Кинематографияни ривожлантириш маркази директори Ойбек Абдушукуров ҳар икки ташкилот ўртасида англашув меморандумини имзолади. Бу ҳақда Кинематографияни ривожлантириш маркази матбуот хизмати хабар берди.
Меморандумга кўра ҳар икки ташкилот ҳамкорлигида «Ёш киноижодкорлар уюшмаси» нодавлат нотижорат ташкилоти таъсис этилади ва келажакда Уюшмага бирлашган ёшлар иштирокида ижтимоий аҳамиятга молик кинолойиҳалар амалга оширилади. Шунингдек, меморандумда Ўзбекистон Ёшлар иттифоқи қошида «Ёшлар пресс клуби»ни ташкил этиш ҳам белгиланган бўлиб, бу орқали ёшлар муаммолари ва уларнинг ечимига бағишланган турли шакл ва жанрларда кўрсатув ва теледебатлар тайёрлаш назарда тутилган.
Тадбирда сўзга чиққан Ўзбекистон Ёшлар иттифоқининг раиси Қаҳрамон Қуронбоев, Кинематографияни ривожлантириш маркази директори Ойбек Абдушукуров ҳамда Ўзбекистон халқ артисти Озодбек Назарбеков бугунги кунда Ўзбекистон ёшларига, жумладан, ижодкор ёшларга берилаётган кенг имкониятлар, давлат миқёсидаги эътибор ҳақида гапириб, ёш ижодкорларни янада фаолликка, бадиий савияси юқори асарлар яратишга чақирдилар.
Изоҳ (0)