Аввал хабар берилганидек, Мосулда ота-онаси ИШИДга олиб кетган камида 48 нафар россиялик бола бор, деб ёзади Meduza. Кўпчилигининг ота-онаси ҳалок бўлган. Болалар ўзлари ҳақида деярли ҳеч нарса айтиб беролмайди. Уларнинг баъзилари рус тилида, бошқалари фақат чечен тилида гапиради. Болаларни уйига қайтариш учун улар Россия фуқаролари эканлигини тасдиқлаш керак.
Болаларни Россияга қайтариш билан шуғулланаётган, асли чеченистонлик бўлган иорданиялик сиёсатчи Самиҳ Бено айтишича, уларни Ироқдан дастлаб Иорданияга келтиришади. Уларнинг ҳужжатлари бўлмагани сабабли, болалардан ДНК намунаси олинади.
Самиҳ Бено Ироқ парламенти аъзоси доктор Надия Жубури WhatsApp’да ярадор қизчанинг суратларини тарқатгач, болаларни қидиришга киришган. У Россияда қизчанинг бувисини топишга муваффақ бўлган. Ҳозир у Бағдоддаги касалхонада ётибди.
WhatsApp’да, шунингдек, отаси асирга олинган ўғил бола акс этган видео ҳам тарқалган. Уни онаси, чеченистонлик аёл таниб қолди. 2015 йилда унинг собиқ эри боласини Сурияга, у ердан Ироққа олиб кетган. Икки йил давомида улар ҳақида ҳеч нарса эшитмаган. 2 август куни 4 ёшли болакай Рамзан Қодиров кўмаги билан Россияга қайтган.
Чеченистон раҳбари маълумотларига кўра, россиялик болалар нафақат Мосулда, балки Бағдодда ҳам бор. Бағдод етимхоналарида россиялик 35—40 нафар бола бор, деди Қодиров. Кўпчилик болаларнинг ҳужжатлари йўқ, чунки улар ИШИДнинг ўзида туғилган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)