Ўзбекистон Республикаси ташқи ишлар вазири Абдулазиз Комилов Япониянинг яқинда тайинланган янги ташқи ишлар вазири, Таро Конога табрик мактубини йўллади. Бу ҳақда Ташқи ишлар вазирилиги матбуот хизмати хабар берди.
Ҳурматли жаноб Коно,Аввалроқ Япония бош вазири Синдзо Абэ мамлакат ташқи ишлар вазири лавозимига Таро Конони тайинлангани ҳақида хабар берилган эди.Сизни Япония Ташқи ишлар вазири лавозимига тайинланганингиз билан самимий табриклашга ижозат бергайсиз.
Ўтган давр мобайнида мамлакатларимиз ўртасида икки ва кўп томонлама муносабатларнинг барча жабҳалари бўйича 2002 йилда қабул қилинган Дўстлик, стратегик шериклик ва ҳамкорлик тўғрисидаги қўшма баёнот руҳида очиқ ва самарали сиёсий мулоқот ўрнатилганини алоҳида мамнуният билан таъкидлашни хоҳлардим.
2015 йилнинг октябрь ойида Япония Бош вазири жаноб Синдзо Абэнинг Ўзбекистонга расмий ташрифининг муваффақиятли ўтиши Ўзбекистон-Япония муносабатларининг юқори даражада эканлигини яна бир бор кўрсатди ҳамда икки томонлама ҳамкорликни бундан буён ҳам ривожлантиришга янгича суръат бахш этди.
Биз жаноб Синдзо Абэнинг Ўзбекистонга ташрифи доирасида эришилган келишувларни амалга оширишга алоҳида аҳамият қаратамиз ва мамлакатларимиз ўртасидаги олий даражадаги сиёсий мулоқотнинг янада ривожланиши, кўп қиррали ҳамкорлигимизни амалий мазмун билан бойитиш тарафдоримиз.
Аминманки, Сизнинг кўмагингизда Ўзбекистон билан Япония ўртасидаги анъанавий дўстлик муносабатлари ва стратегик шериклик икки давлат халқлари фаровонлиги йўлида келажакда ҳам ҳар томонлама ривожланади.
Жаноб Коно, Сизга мустаҳкам соғлик, оилавий хотиржамлик ва масъулиятли давлат лавозимидаги фаолиятингизга зафарлар тилайман.
Абдулазиз Комилов, Ўзбекистон Республикаси Ташқи ишлар вазири
Изоҳ (0)