Марказий банк бошқарувининг қарори (рўйхат рақами 2900, 2017 йил 21 июль) билан жисмоний шахсларга банк пластик карточкаси орқали overdraft кредити бериш тартиби тўғрисидаги Низом тасдиқланди, деб хабар берди Norma.
Overdraft кредити — банк пластик карточкаси сақловчисига тўловларни амалга оширишда банк пластик карточкаси ҳисоб варағидаги қолдиқ маблағидан ортиқ миқдордаги маблағни ишлатиш ҳуқуқини берувчи кредитлашнинг қисқа муддатли шакли. Ушбу кредитни олиш учун тижорат банки ва жисмоний шахс (мижоз) ўртасида overdraft шартномаси тузилади.
Overdraft қайтаришлик, тўловлилик, муддатлилик ва таъминланганлик шартлари билан берилади. Кредитларнинг ушбу турига мақсадлилик шартлари қўлланилмайди.
Overdraft’ни олиш учун мижоз банкка қуйидаги ҳужжатларни тақдим этади:
- overdraft олишга буюртманома;
- паспорт нусхаси;
- даромадлари тўғрисидаги маълумотлар.
Overdraft ариза берувчининг ўртача даромадини (ойлик иш ҳақининг, пенсиянинг) 3 баробаригача бўлган миқдорда 12 ойгача бўлган муддатга қайта тикланадиган (револьвер) шаклда, overdraft шартномасига илова қилинган жадвалга мувофиқ босқичма-босқич қайтариш шарти билан берилади.
Кредит бўйича йиллик фоиз ставкаси миқдори шартнома асосида белгиланади. Overdraft шартномаси унда белгиланган маблағлар фойдаланилган кундан эътиборан кучга кирган ҳисобланади. Кредит бўйича фоиз фақатгина мижоз томонидан ишлатилган маблағ учун ҳисобланади.
Overdraftни қайтариш иш ҳақи, пенсия ёки бошқа маблағларни банк пластик карточкасига кирим қилиш орқали амалга оширилади. Overdraft ва унга ҳисобланган фоизлар ўз вақтида қайтарилмаган тақдирда банк кредитлашни тўхтатади ва уларни қайтариш чораларини кўради.
Шартнома томонлардан бирининг шартнома муддати тугашидан камида 30 кун олдин иккинчи томонни шартномани амал қилишини тугатиш тўғрисида хабарнома юбормаса, ўз-ўзидан кейинги 12 ойга узайтирилган ҳисобланади.
Ҳужжат Қонун ҳужжатлари тўпламининг 29 (789)–сонида эълон қилинди ва 24.07.2017 йилда кучга кирди.
Изоҳ (0)