«Чуқурсой техник идора» чегара-божхона постида Хитойдан Фарғона вилоятида фаолият юритувчи «Яхши Ният Замин Файзи» МЧЖ номига келтирилган юклар ортилган иккита темир йўл контейнери юк эгаси ва холислар иштирокида божхона кўригидан ўтказилди. Бу ҳақда «Дарё»га Тошкент шаҳар божхона бошқармаси ахборот хизмати маълум қилди.
Кўрик давомида мазкур контейнерлар йўл-юк кузатув ҳужжатларида кўрсатилмаган 28 минг донадан ортиқ адёл, 12700 дона электр ҳисоблагич, 183 минг дона компакт диск, ошхона идишлари, маиший техника буюмлари, кийим-кечаклар, жами 21 турдаги турли товар-моддий бойликлар билан тўлдирилгани аниқланди. Шу тариқа қонунбузарлар қиймати салкам 4 миллиард сўм бўлган товар-моддий бойликларни яширин йўллар билан олиб киришга уринган экан.
Мазкур ҳолат юзасидан тўпланган ҳужжатлар Тошкент транспорт прокуратурасига юборилди ва ҳозирда дастлабки тергов ҳаракатлари олиб борилмоқда.
Шунингдек, Тошкент шаҳар божхона бошқармасининг «Бошпочтампт» ташқи иқтисодий фаолият божхона постида пойтахтда фаолият юритувчи International postal and courier курьерлик ташкилоти ходимларининг қинғирликлари фош қилинди.
Ушбу ташкилот орқали республикага келтирилган 2,5 тонна оғирликдаги 46 та почта жўнатмасини божхона назоратидан ўтказиш давомида курьерлик ташкилоти ходимлари Аззамов, Эркаев ва Козимов божхона назоратидан ўтказилиши лозим бўлган 46 та почта жўнатмасидан 36 тасини божхона тўловларидан бўйин товлаш мақсадида яширишга ҳаракат қилди.
Почта жўнатмаларидаги қиймати 87 миллион сўмдан ортиқ бўлган турли товар-моддий бойликларнинг республика ҳудудига яширинча олиб кирилишига чек қўйилди. Ушбу ҳолат юзасидан айбдор шахсларга нисбатан Ўзбекистон Республикаси Жиноят кодексининг 182-моддаси билан жиноят иши қўзғатилди.
Изоҳ (0)