Ўзбекистон олий таълим муассасаларидаги ижодий имтиҳонлар юзасидан бир неча шикоятлар келиб тушди. Аввалроқ Ўзбекистон давлат жаҳон тиллари университети Халқаро журналистика факультети ижодий имтиҳонлари баҳоларидан норози абитуриентларнинг шикоятлари эълон қилинган эди. Кейинроқ Тошкент архитектура-қурилиш институтига ҳужжат топширган абитуриент видеохабар йўллади. Эътиборга молик жиҳати, ТАҚИдаги вазият юзасидан институт вакиллари изоҳ берди.
Абитуриент нима дейди?
Тошкент архитектура-қурилиш институтига кириш имтиҳонлари доирасида расм ва чизмачилик йўналишлари бўйича ижодий синовлар бўлиб ўтган. Бироқ бу синовларнинг натижалари кўплаб абитуриентларнинг норозилигига сабаб бўлган.«Дарё»га мурожаат қилган абитуриентлардан бирининг сўзларига кўра, ижодий ишларга нисбатан паст баҳолар қўйилган. «Айни вақтда, ижодий ишларини қониқарли деб айтиш қийин бўлган баъзи абитуриентларга юқори баллар қўйилган», — дейди абитуриент.
Ижодий имтиҳонлар баҳолари юзасидан аппелляция бериш жараёнида 100 дан зиёд абитуриент, уларнинг ота-оналари, яқинлари қатнашган. Вазият кескинлашиб, «тўполонга айланиб кетган, баҳолардан ҳамма норози бўлган».
Барча норози абитуриентлар ва уларнинг ота-оналари ижодий имтиҳон қайтадан ўтказилишини талаб қилган, бироқ институт вакиллари бу талабни рад этиб, апелляция жараёни янгидан бўлиб ўтишини эълон қилган. «Навбатим келгунича олти соат ўтирдим, атиги бир балл қўшиб беришди», — дейди мурожаатчи.
Институт вакиллари-чи?
ТАҚИ апелляция комиссияси раҳбари Муҳаммаджон Аҳмедовнинг «Дарё»га маълум қилишича, бино ва иншоотлар қурилиши йўналиши бўйича ўқишга ҳужжат топширган 1400 дан зиёд абитуриент расм ва чизмачиликдан ижодий имтиҳон топширган. Имтиҳонларнинг ҳар бири бўйича абитуриент 37,8 баллгача, умумий 75,6 балл тўплаши мумкин.Апелляция жараёни икки кунга чўзилган. Биринчи куни 82 та, иккинчи куни 68 та — жами 150 та аризачининг даъволари кўриб чиқилган. Биринчи кунда ҳам, иккинчи кунда ҳам аризаларни кўриб чиқиш 23:30 гача давом этган. Иккинчи кунги апелляция жараёнида комиссия ишида нафақат институт вакиллари, балки олий ва ўрта махсус таълими вазири биринчи ўринбосари, Давархқўм ходимлари, шунингдек, апелляцияга келган абитуриентларнинг ота-оналари томонидан овоз бериш йўли билан танланган холис уч ота-она қатнашган.
Апелляцияга ота-онаси билан бирга келган абитуриентлар ота-оналари билан бирга қабул қилинган, уларнинг ишлари қайта кўриб чиқилиб, камчиликлари кўрсатилган, баъзиларига баҳолари 1-2 балл кўтариб берилган. «Ёнимда туриб чизган абитуриентнинг иши қониқарли эмасди, лекин у юқори балл олибди, деганлар бўлди. Ўша абитуриентнинг кимлигини айтинг, ишини кўриб чиқамиз, деб барча талабгорларга айтдик, бироқ уларнинг ҳеч бири исм-фамилияларни келтирмади», — дейди Муҳаммаджон Аҳмедов.
Айни вақтда, баъзи абитуриентларнинг талабига кўра, юқори баҳога лойиқ кўрилган ишлар ҳам, янада пастроқ баҳо қўйилган чизмалар ҳам олиб чиқиб кўрсатилган. «Апелляцияда қатнашган абитуриентларнинг бари аризалари бўйича комиссия қарорларидан қониқиш ҳосил қилганликлари ҳақида тилхат топширган. Баъзилар устимиздан Президент порталига шикоят қилишини айтди. Бу уларнинг ҳуқуқи, агар бизнинг қароримиздан қониқмаган бўлса, шикоят қилиши мумкин», — деди апелляция комиссияси раиси.
Изоҳ (0)