Қозоғистон банки фоизсиз кредит сўраган мижозига 100 минг «лайк» учун миллион тенге ваъда қилди

Қозоғистоннинг ForteBank банки фоизсиз кредит сўраган мижози Берик Сарбасовга антиқа таклиф билан чиқди. Бу ҳақда Afisha Daily хабар бермоқда.

«Биз сизга бундай кредит тақдим эта олмаймиз, ҳар ҳолда ‘банк’ деган номимиз бор. Бироқ бундан ҳам зўр, сиз учун махсус таклифимиз бор. Сиз постингизда бизни тилга олиб ўтасиз, ҳафта давомида у қанча ‘лайк’ тўпласа, уни 10 га кўпайтириб, картангизга ўтказиб берамиз. 100 та лайк тўпласангиз 1000 тенге оласиз, 100 000 учун — миллион», — дейилади банк таклифида.

ForteBank бунинг учун мижозга бир ҳафта муҳлат берди. Ҳозиргача Сарбасовнинг пости остида 8,8 мингдан ортиқ «лайк» тўпланди. 

Маълумот учун, миллион тенге 3 минг доллардан ошиқ суммани ташкил этади.