Навоий вилоят божхона бошқармаси ходимлари бевосита деҳқон хўжаликларининг қишлоқ хўжалиги маҳсулотлари етиштирилаётган далалар, полиз ва боғларига ташриф буюрмоқда. Бу ҳақда «Дарё»га бошқарма ахборот хизмати маълум қилди.
Хатирчи туманида истиқомат қилувчи Илҳом Шерматов ўз хонадонида 15 йилдан бери лимон, узум, олма ва бошқа меваларни етиштириб келмоқда. Божхоначилар унинг хонадонида бўлиб, мамлакатда экспортни ривожлантириш ва рағбатлантириш борасида амалга оширилаётган кенг кўламли ишлар, экспортни қўллаб-қувватлаш мақсадида бериладиган имтиёзлар ҳақида батафсил тушунтириш берди.
Божхона расмийлаштируви учун лозим бўладиган ҳужжатлар тўғрисида маълумотлар тақдим этилди. Эндиликда у каби деҳқон ва боғбонларга ўз маҳсулотларини четга олиб чиқиш янада осонлашгани тушунтирилди. Илҳом Шерматов бу йилги ҳосилини энди ўзи мустақил равишда экспорт қилмоқчилигини маълум қилди.
Ўзбекистон Республикаси Президентининг «Маҳаллий экспорт қилувчи ташкилотларни янада қўллаб-қувватлаш ва ташқи иқтисодий фаолиятни такомиллаштириш чора-тадбирлари тўғрисида»ги қарорига кўра,2017 йилнинг 1- июлидан бошлаб барча тадбиркорлик субъектларига янги мева-сабзавот маҳсулотлари, узум ва полиз маҳсулотларини тўловни олдиндан 100 фоиз амалга ошириш шарти билан тўғридан-тўғри шартномалар асосида экспорт қилиш ҳуқуқи берилди.
Экспорт товарларининг божхона расмийлаштируви божхона органига барча ҳужжатлар тақдим этилган кундан эътиборан 3 иш куни ичида амалга оширилиши белгиланган. Ҳозирда экспортга мўлжалланган қишлоқ ҳўжалиги маҳсулотлари сифати бузилишини олдини олиш ва харидорга тезлик билан етказиб беришга кўмаклашиш мақсадида Навоий вилояти божхона постлари томонидан ушбу амалиёт божхона органига барча ҳужжатлар тақдим этилгандан сўнг 3 соат ичида амалга оширилмоқда.
Изоҳ (0)