Wi-Fi’нинг фойдаланувчи шартномасини ўқимаган 22 минг одам ўз хоҳиши билан ҳожатхона тозалаш ишларига ёзилиб қўйди

Британиянинг Purple провайдери одамлар Wi-Fi фойдаланувчи шартномасини ўқимаслиги борасида акция ўтказди. Икки ҳафта давомида 22 минг одам ҳожатхоналар тозалаш бўйича 1000 соатлик ҳажмдаги ишларга ўз хоҳиши билан ёзилиб қўйган. Акцияга Mashable нашри эътибор қаратди, деб хабар берди «Daily Afisha».

Провайдер фойдаланувчилар Wi-Fi’дан фойдаланишларидан олдин қабул қилишлари керак бўлган шартга жамоат ишларида иштирок этиш бандини ҳам қўшиб қўйди. У ўз ичига боғларни итлар чиқиндисидан тозалаш, бошпанасиз ҳайвонларни қарамоғига олиш, жамоат ҳожатхоналарини тозалаш, шиллиқуртларни бўяш ҳамда асфальтга ёпишган сақичларни кўчириб чиқиш каби бандларни олган.

Икки ҳафта ичида фақатгина битта одам бемани таклифларни сезиб қолган. Purple эътиборсиз фойдаланувчилар ўзлари рози бўлиб белгилаган ишларига мажбурлаб жалб қилинмаслигини маълум қилди.

Провайдер бу билан маълумотларни ҳимоя қилиш қонунига одамлар эътиборини жалб этмоқчи бўлган. Янги қонунга кўра компаниялар маълумотлардан фойдаланиш шаффофлигини оширишлари, шунингдек, шахсий маълумотларни тақдим этишга тайёр туришлари лозимлиги белгиланган. У 2018 йилнинг май ойидан бошлаб Европа иттифоқида амалга киради.