Ўзбекистон Республикаси Ташқи ишлар вазирлиги делегацияси 10—11 июль кунлари Кот-д’Ивуарнинг Абиджан шаҳрида Ислом ҳамкорлик ташкилоти ташқи ишлар вазирлари кенгашининг 44-сессиясида иштирок этади. Бу ҳақда вазирлик матбуот хизмати хабар бермоқда.
Сессияда Ўзбекистоннинг 2016—2017 йиллардаги ИҲТ ТИВKдаги раислиги якунларини кўриб чиқиш, ташкилот фаолиятига оид қатор масалаларни муҳокама қилиш ва сиёсий, ҳуқуқий, ташкилий, ижтимоий-иқтисодий ва маданий-гуманитар масалалар бўйича қарорлар қабул қилиш режалаштирилган.
Йиғилишда Ўзбекистон Президенти Шавкат Мирзиёевнинг ИҲТ ТИВKнинг Тошкентда бўлиб ўтган 43-сессиясида сўзлаган маърузасида илгари сурилган ташаббусларни қўллаб-қувватлаш учун «Самарқанддаги Имом Бухорий халқаро тадқиқотлар маркази тўғрисида» ва «Таълим, фан ва маданият масалалари бўйича ислом ташкилотининг (ISESCO) махсус кафедрасини Тошкент ислом университети таркибида ташкил этиш тўғрисида»ги махсус резолюцияларнинг қабул қилиниши кутилмоқда.
ТИVKнинг 44-сессияда кенгаш раислиги Ўзбекистондан Кот-д’Ивуарга расман ўтади.
Изоҳ (0)